07.09.2026 | 14:59
Պեսկովը հայտնել է Փաշինյան-Պուտին հանդիպման օրակարգը
Ուզբեկստանում Հայաստանի դեսպանն իր հավատարմագրերն է հանձնել երկրի ԱԳ նախարարին
Քաղաքականություն
16.02.2026 | 22:54
Գեորգի Քոչարյանը փետրվարի 16-ին հավատարմագրերն է հանձնել Բախտիյոր Սաիդովին՝ Ուզբեկստանում Հայաստանի դեսպան նշանակվելու կապակցությամբ։ Հանդիպման ընթացքում կողմերը քննարկել են հայ-ուզբեկական հարաբերությունների զարգացման հեռանկարները, տնտեսական և առևտրային կապերի ընդլայնումը, ինչպես նաև տարածաշրջանային գործընթացները՝ ընդգծելով խաղաղության օրակարգի և միջտարածաշրջանային փոխկապվածության կարևորությունը։ Այս մասին հայտնում է Ուզբեկստանում Հայաստանի դեսպանությունը։
«Հանձնման արարողությունից հետո կայացել է դեսպան Քոչարյանի և արտաքին գործերի նախարար Սաիդովի հանդիպումը, որի ընթացքում քննարկվել են Հայաստանի և Ուզբեկստանի միջև հարաբերությունների զարգացման հեռանկարները և երկուստեք հետաքրքրություն ներկայացնող հարցեր:
Մասնավորապես՝ կարևորվել է 2025-ի օգոստոսի 8-ին Վաշինգտոնում Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին համաձայնագրի նախաստորագրումը՝ որպես տարածաշրջանում կայունության և խաղաղության հաստատման որոշիչ գործոն: Անդրադարձ է կատարվել միջտարածաշրջանային փոխկապվածության զարգացման հեռանկարներին:
Երկուստեք կարևորվել է Հայաստանի և Ուզբեկստանի միջև տնտեսական և առևտրային կապերի զարգացումն ու ընդլայնումը, բարձրագույն և բարձր մակարդակի փոխայցերի կազմակերպումը, միջկառավարական հանձնաժողովի հերթական նիստի անցկացումը:
Հանդիպման ավարտին նախարար Սաիդովը հաջողություն է մաղթել ՀՀ նորանշանակ դեսպանին իր ապագա գործունեության մեջ»,- ասվում է հաղորդագրությունում:
