10.06.2026 | 13:12
«Ուժեղ Հայաստանի» պատգամավորի թեկնածու Գոհար Մելոյանի ասուլիսը. ՈւՂԻՂ
Կաթողիկոսին կարող են ձերբակալել, եթե ՔՊ-ն հաղթի հունիսի 7-ին․ մեղադրանքի առաջադրումը կանխատեսելի էր․ Անի Սամսոնյան․ ՏԵՍԱՆՅՈՒԹ
Քաղաքականություն
16.02.2026 | 19:00
Քաղաքական գործիչ Անի Սամսոնյանը կարծում է, որ Գարեգին Երկրորդ Ամենայն Հայոց Կաթողիկոսի դեմ մեղադրանք առաջադրելը հակաեկեղեցական արշավի մաս է, և չի բացառում, որ ընտրություններից հետո իշխանությունը կարող է գնալ նաև նրա ձերբակալությանը։ Factor TV-ի հետ զրույցում նա այս գործընթացները որակեց կանխատեսելի։
«Հակաեկեղեցական արշավի հենց սկզբից հասկանալի էր ու կանխատեսելի էր, որ Նիկոլ Փաշինյանը կարող է գնալ այդ քայլին՝ Կաթողիկոսի դեմ քրեական գործ հարուցել, այնուհետև՝ ձերբակալել։ Մենք դա էլ կարող ենք տեսնել, բայց դա, իհարկե, ես կարծում եմ, կտեսնենք ընտրություններից հետո, եթե ՔՊ-ն վերարտադրվի որպես իշխանություն, որովհետև մինչև ընտրությունները չեմ կարծում՝ այդ քայլին գնան», – նշեց Սամսոնյանը՝ հավելելով, որ իշխանությունը զգում է հանրային դիմադրությունն ու իր ռեյտինգի անկումը։
Նրա խոսքով՝ մեղադրանքի բնույթը ցույց է տալիս իշխանության հայտարարությունների սնանկությունը. «Շատ ծիծաղելի է, երբ Կաթողիկոսի նկատմամբ աշխարհի բոլոր մահացու մեղքերն ու հանցանքները ուղղելուց հետո նրան մեղադրանք են առաջադրում ինչ-որ դատական գործին խոչընդոտելու համար։ Սա ցույց է տալիս, որ այն, ինչ խոսում, ներկայացնում ու հայտարարում է ՔՊ-ն, տակը բան չկա, փուչիկ է»։
Անդրադառնալով առաջիկա ընտրություններին՝ քաղաքական գործիչը նշում է, որ ընդդիմադիր ուժերի համար պետք է լինի հստակ առաջադրանք. «Ընդդիմության նվազագույն նպատակը, նվազագույն առաջադրանքը վատագույն դեպքում պետք է լինի, որպեսզի թույլ չտալ Նիկոլ Փաշինյանին հավաքել բացարձակ մեծամասնություն՝ 50+1»։
Սամսոնյանը նաև քննադատում է իշխանությանը նախկիններին քաղաքական դաշտում պահելու համար։ Նրա խոսքով, Փաշինյանը պետք է դեռ 2018-ին ստեղծեր այնպիսի իրավիճակ, որ օլիգարխները մոռանային քաղաքականության մասին, իսկ նախկին նախագահները լինեին քրեակատարողական հիմնարկում։ «Բայց ինքը պահեց այդ մարդկանց քաղաքականության մեջ, օգտագործեց որպես նախկիններ, որպես գործիք, որպեսզի ինքը նրանց ֆոնին վերարտադրվի, փչացրեց ամբողջ քաղաքական դաշտը, հետաձգեց նոր մարդկանց, նոր քաղաքական ուժերի մուտքը քաղաքական դաշտ, և հիմա ասում է՝ ժամանակն է, որպեսզի այդ մարդիկ դուրս շպրտվեն»։
Նա նաև նշեց, որ նախկին իշխանությունների վախի գործոնը մարդկանց մոտ թուլացել է, այդ իսկ պատճառով Փաշինյանը բացում է նոր թեմաներ՝ «կռիվ տալով եկեղեցու դեմ, հասարակությանը բաժանելով եվրոպամետների ու ռուսամետների, ագենտների ու գրանտակերների», քանի որ «նախկինների թեման մարվել է, չկա»։
Հարցազրույցն ամբողջությամբ՝ տեսանյութում։
Ռոբերտ Անանյան
