30.09.2026 | 21:27
«Դարի կողոպուտը». Էրդողանի բարձրաստիճան կուսակցի ակտիվները սառեցվում են ներդրումային ֆոնդի շուրջ սկանդալի ֆոնին
Հայաստանը ՌԴ-ին չի արտահանձնի քաղաքական դրդապատճառներով հետապնդվողներ անձանց. Ալեն Սիմոնյան
Քաղաքականություն
16.02.2026 | 14:07
Հայաստանը Ռուսաստանին չի արտահանձնի քաղաքական դրդապատճառներով հետապնդվողներ անձանց։ ՀՀ Ազգային ժողովի նախագահ Ալեն Սիմոնյանն այս մասին հայտարարել է «Դոժդ» հեռուստաալիքին տված հարցազրույցում, փոխանցում է DW-ի ռուսական ծառայությունը։
«Ես երաշխավորում եմ ձեզ՝ ոչ մի անձ չի ձերբակալվի կամ չի արտաքսվի որևէ երրորդ երկիր քաղաքական դրդապատճառներով։ Ես սա պաշտոնապես երաշխավորում եմ»,- շեշտել է նա։
Նա հիշեցրել է, որ ՌԴ շատ քաղաքացիներ, որոնց իրենց երկրներում պիտակավորում են «օտարերկրյա գործակալներ», գալիս են Հայաստան՝ համերգների, և նրանց մոտ «շատ լավ է անցնում»։
«Մեմորիալ. աջակցություն քաղաքական բանտարկյալներին» նախագծի ղեկավար Սերգեյ Դավիդիսն ավելի վաղ նշել էր, որ Հայաստանը Ռուսաստանի իշխանություններից ստանում է արտահանձնման հարցումներ: Սակայն այնտեղի քաղաքական ակտիվիստները սովորաբար սկզբում պաշտոնապես ձերբակալվում են, ապա ազատ արձակվում։
«Դոժդ»-ի լրագրող Եկատերինա Կոտրիկաձեի հարցին՝ կապված հետապնդվող ռուսների արտահանձնման վերաբերյալ Երևանի դիրքորոշման հետ, Ալեն Սիմոնյանը պատասխանել է, որ Հայաստանից «զրո մարդ» է արտաքսվել:
«Եղել են իրավիճակներ, երբ մարդիկ ձերբակալվել են, բայց հանգամանքների պարզաբանումից հետո այս առանձին դեպքերն ավարտվել են նրանով, որ մենք նրանց ազատ ենք արձակել»,- շարունակել է նա։
Թարգմանությունը՝ Էմմա Չոբանյանի
