Գարեգին Բ-ին առաջադրված մեղադրանքը կապված է եպիսկոպոսաց առաջիկա ժողովի հետ. Տիգրան Աբրահամյան․ ՏԵՍԱՆՅՈՒԹ

Ազգային ժողովի նախագահի հայտարարությանը իրավական ընթացք պետք է տրվի։ Այս մասին ԱԺ ճեպազրույցների ժամանակ նշեց «Պատիվ ունեմ» խմբակցության պատգամավոր Տիգրան Աբրահամյանը։

Խոսքը փետրվարի 15-ին ռուսական Дождь ընդդիմադիր հեռուստաալիքի յութուբյան էջում հրապարակված հարցազրույցի մասին է, որի ընթացքում ԱԺ նախագահ Ալեն Սիմոնյանը նշել էր, որ եկեղեցու դեմ արշավ չկա, կա արշավ այն մարդկանց նկատմամբ, որոնք սպասարկում են օտար շահեր․ «Ենթադրենք, որևէ երկրում, եթե պարզվի, որ X անձը, որը բարձր պաշտոն է զբաղեցնում եկեղեցում, մանկապիղծ է, և եթե դրան արձագանքեն իրավապահ մարմինները կամ որևէ քաղաքական գործիչ հանդես գա մանկապղծության կամ նմանատիպ բանի քննադատությամբ, դա հարձակո՞ւմ կլինի եկեղեցու վրա»։

Լրագրողի հարցին՝ ում նկատի ունի Սիմոնյանը, վերջինս նշել է, որ «կան նման բարձրաստիճան հոգևորականներ, ոչ շատ, չորս-հինգ հոգի»։

«Ակնհայտ է, որ սա հենց այնպես օդում չպետք է մնա և սրա հետ կապված պետք է իրավական գործընթաց լինի»,- ընդգծել է Աբրահամյանը։

Պատգամավորի խոսքով՝ ինչ վերաբերում է Ամենայն հայոց կաթողիկոսի դեմ նախաձեռնված քրեական վարույթին, ապա նա դա կապում է եպիսկոպոսաց ժողովի հետ․ «Ակնհայտորեն ինչ-որ փուլում լինելու էր այսպիսի դրսևորում, այսպիսի մեծ և մասշտաբային համակարգային հարձակումների պարագայում, բայց որոշակի գործողությունները արագացվեցին կապված Վիեննայում նախատեսված այդ հայտնի ժողովի հետ»։

Մանրամասները՝ տեսանյութում։