Պապիկյանը նախընտրական շրջանում հակառակորդի համար ամեն ինչ ցուցադրում է. Աբրահամյան․ ՏԵՍԱՆՅՈՒԹ

«Համենայն դեպս, ավելորդություն չի լինի մեզ համար»,- այսպես արձագանքեց «Պատիվ ունեմ» խմբակցության պատգամավոր Տիգրան Աբրահամյանը ԱՄՆ-ից «V-BAT» տեսակի անօդաչու թռչող սարքերի ձեռքբերման վերաբերյալ Factor TV-ի հարցին։

«Մեր ռազմարդյունաբերական որոշ ընկերություններ ևս ունեն նմուշներ, որոնք այսօր հիմնական շուկաներում ահագին մրցունակություն են առաջացնում։ Միացյալ Նահանգների հետ ռազմական համագործակցությունը շատ կարևոր է դիտարկել ռեգիոնալ տեսանկյունից՝ Հայաստանին մատակարարված և Ադրբեջանի հետ եղած հնարավոր ռազմական համագործակցությունը ռեգիոնում հավասարակշռությունը պահպանո՞ւմ է, թե՞ խախտում է»,- նշեց Աբրահամյանը։

Անդրադառնալով վերջին շրջանում ՊՆ-ի կողմից ամրաշինական կառույցների և ձեռք բերված զինատեսակների ցուցադրությանը՝ Աբրահամյանը նշեց․

«Ես ինքս ամրաշինական շրջաններ դեռևս մի քանի տարի առաջ այցելել եմ, ինքս տիրապետում եմ տարբեր առանձնահատկությունների, այնտեղ նախատեսված տարբեր միջոցներին։ Ինքս տեսել եմ տարբեր հրետանային միջոցներ կամ ՀՕՊ միջոցներ, որոնք տեղակայված են, բայց դրանց մասին հրապարակային չեմ խոսել, համարել եմ դա գաղտնի էլեմենտներ։ Ի տարբերություն Պաշտպանության նախարարության, որոնք զուտ ընտրական քարոզարշավի առանձնահատկություններից ելնելով՝ ամբողջությամբ հակառակորդի համար հնարավորինս ներկայացնում են այն ամենը, ինչ որ այսօր կա այդ ինժեներական կառույցների հետ կապված»,- նշեց պատգամավորը։

Մանրամասները՝ տեսանյութում։