24.06.2026 | 05:04
ԱԱ-2026. Խորվաթիան տարավ առաջին հաղթանակը. ՏԵՍԱՆՅՈՒԹ
Ջրաշենում դասարանցիներն այնպես են ծեծել 13-ամյա պատանուն, որ նրան տեղափոխել են հիվանդանոց․ վարույթ է նախաձեռնվել․ ՆԳՆ
Հասարակություն
12.02.2026 | 18:18
ՆԳՆ ոստիկանությունից հայտնում են, որ Ջրաշենում երեք համադասարանցիներն այնպես են ծեծել 13-ամյա պատանուն, որ նրան շտապօգնության մեքենայով տեղափոխել են բժշկական կենտրոն։ Նշվում է նաև, որ դպրոցի մանկավարժական կազմը թաքցրել է իրականությունը։
«Փետրվարի 11-ին՝ ժամը 12-ի սահմաններում, ՆԳՆ ոստիկանության Լոռու մարզի օպերատիվ կառավարման կենտրոն հաղորդում է ստացվել, որ շտապօգնության խումբը Ջրաշեն գյուղից մարմնական վնասվածքներով Սպիտակի բժշկական կենտրոն է տեղափոխել 13-ամյա պատանու: Մայրը հայտնել է, որ որդուն Ջրաշենի միջնակարգ դպրոցում ծեծի է ենթարկել համադասարանցին:
Համայնքային ոստիկանության Սպիտակի բաժնի ծառայողները ձեռնարկած միջոցառումներով պարզել են, որ դասարանում տեղի ունեցած վիճաբանության ժամանակ հիվանդանոց տեղափոխված պատանուն ծեծի են ենթարկել երեք համադասարանցիները, մինչդեռ դպրոցի մանկավարժական կազմը թաքցրել է իրականությունը:
ՆԳ նախարարի անունից դեպքի վերաբերյալ միջնորդագիր կներկայացվի ԿԳՄՍ նախարարին։
Համադասարանցուն ծեծի ենթարկած անչափահասները կազմված փաստաթղթերի հետ ներկայացվել են նախաքննական մարմին:
Նախաձեռնվել է քրեական վարույթ՝ առողջությանը միջին ծանրության վնաս պատճառելու և երեխայի դաստիարակության կամ խնամքի պարտականությունը չկատարելու կամ ոչ պատշաճ կատարելու մեղադրանքներով։
Կատարվում է նախաքննություն»,- ասված է հաղորդագրությունում։
Հիշեցնենք, որ նմանատիպ դեպք էր տեղի ունեցել 2025 թվականին Զորականում, երբ բարձր դասարանի աշակերտները ծեծի էին ենթարկել Նոյեմբերյանի պետական քոլեջի մի ուսանողի։
