Կարգալույծ հռչակված եպիսկոպոսը պետք է մնա՞ Մասյացոտնի թեմի առաջնորդի պաշտոնին․ դատարանը մերժել է հայցի ապահովման միջոցը վերացնելու մասին ՀԱԵ-ի միջնորդությունը

Հայաստանյայց Առաքելական Սուրբ Եկեղեցու փաստաբանական թիմի միջնորդությունն ընդդեմ կարգալույծ հռչակված Գևորգ եպիսկոպոս Սարոյանի նկատմամբ կիրառված հայցի ապահովման միջոցը վերացնելու մասին միջնորդությունը մերժվել է:

Արմավիրի մարզի ընդհանուր իրավասության դատարանը՝ դատավոր, ԲԴԽ անդամ Էդգար Հովհաննիսյանի նախագահությամբ, հունվարի 16-ին որոշում էր կայացրել հայցի ապահովման միջոց կիրառելու մասին հայցվոր Արման Սարոյանի միջնորդությունը բավարարել և պարտավորեցնել պատասխանող «Հայաստանյայց Առաքելական Սուրբ Եկեղեցի» կրոնական կազմակերպությանը և այլ անձանց, առանց խոչընդոտի ապահովելու Սարոյանի պաշտոնավարումը Մասյացոտնի թեմի առաջնորդի պաշտոնում մինչև գործով եզրափակիչ դատական ակտ կայացնելը: Բացի այդ, դատարանն արգելել է պատասխանող ՀԱԵ-ին և այլ անձանց իրականացնել որևէ գործողություն, որը կարող է որևէ կերպ խոչընդոտել հոգևորականի՝ որպես Մասյացոտնի թեմի առաջնորդի, իրականացնելու Հայաստանյայց Առաքելական Սուրբ Եկեղեցու կանոնադրության 68-րդ հոդվածով, ինչպես նաև կիրառելի այլ կանոններով թեմի առաջնորդի համար սահմանված իրավասություններն ու պարտականությունները, այդ թվում նաև՝ Մասյացոտնի թեմի ֆինանսական հաշիվների տնօրինումը և թեմի ֆինանսական գործարքների իրականացումը մինչև գործով եզրափակիչ դատական ակտ կայացնելը:

Հայաստանյայց Առաքելական Սուրբ Եկեղեցու փաստաբանական թիմը հենց այս՝ հայցի ապահովման միջոցը վերացնելու մասին էր միջնորդություն ներկայացրել, որը երեկ դատարանը մերժել է։

Փաստաբան Արա Զոհրաբյանը, որը կաթողիկոսին աջակցություն հայտնած հոգևորականների ներկայացուցիչն է մի շարք գործերով, ֆեյսբուքյան գրառմամբ նշել է՝ Հայրապետի տնօրինությունը չի կարող դատական վերահսկողության առարկա դառնալ:

Հիշեցնենք՝ հունվարի 10-ին Գարեգին Բ Ամենայն Հայոց կաթողիկոսի տնօրինությամբ հոգևորականը ազատվել էր Մասյացոտնի թեմի առաջնորդի պաշտոնից, Սարոյանն էլ իր հերթին այն վիճարկել է դատարանում։ Այս ընթացքում կաթողիկոսը կարգալույծ է հռչակել Գևորգ եպիսկոպոս Սարոյանին․ նա այն 10 եպիսկոպոսներից մեկն է, որը միացել է Նիկոլ Փաշինյանի՝ «եկեղեցու բարենորոգման» օրակարգին։

Ռոզա Վարդանյան