Անկախական Գևորգից վերածվել եք բոլշևիկ Հայկի․ Ռուբինյանը՝ ՀՅԴ-ի և «Սարոյան եղբայրներ» ֆիլմի մասին․ ՏԵՍԱՆՅՈՒԹ

««Սարոյան եղբայրներ» ֆիլմը իրապես հակադաշնակցական է, և ասեմ ավելին՝ հակաանկախական ֆիլմ է, որովհետև սովետական ժամանակներում հակաանկախականությունը ու հակադաշնակցականությունը նույն բանն էր»,- այս մասին խորհրդարանում ՀՅԴ-ի մասին խոսելիս նշեց ԱԺ փոխնախագահ Ռուբեն Ռուբինյանը։

«Հիշեցնեմ՝ «Սարոյան եղբայրներ» ֆիլմում երկու եղբայր են՝ Գևորգը ու Հայկը։ Գևորգը դաշնակցական և հետևաբար՝ անկախական, Հայկը՝ բոլշևիկ և հեղափոխական։ Խնդիրն այն է, սիրելիներս, որ դուք Գևորգից վերածվել եք Հայկի։ Խնդիրն էն ա, որ դուք սկսել եք «Մահ կամ ազատություն»-ից, ավարտել եք «004 շրջաբերականով։

Խնդիրն էն ա, որ մի կուսակցություն, որի անվանումը նույնական է եղել անկախականության հետ, հասել է մի կետի, երբ 1988 թվականին անկախական շարժումն էր ծնվում և մոլեգնում (բառիս լավ իմաստով) Հայաստանում, ձեր կուսակցությունը դեմ է արտահայտվել անկախությանը, հասկանո՞ւմ եք»,- նշեց Ռուբինյանը։

Հիշեցնենք՝ «Հայաստան» խմբակցությունը պնդում է՝ Հակոբ Հակոբյանը, լինելով ՀՌՀ անդամ, «1-in.am» լրատվական կայքին տված հարցազրույցում քաղաքական գնահատականներ է հնչեցրել Հայ Յեղափոխական Դաշնակցություն կուսակցության հասցեին, և այդ գնահատականներն ուղեկցվել են ատելության քարոզով: Քաղաքական տարբեր ընդդիմախոսների վերաբերյալ տրվել են ձևակերպումներ:

«Ես համաձայն եմ Հակոբ Մովսեսի հետ, որ Դաշնակցությունը պիտի փոխի իր գաղափարախոսությունը, բայց ոչ թե փոխի ձեր 135-ամյա գաղափարախոսությունը, այլ վերադառնա իր ակունքներին։ Որովհետև դուք ձեր ակունքներին դավաճանել եք, սիրելիներս։ Դուք «Մահ կամ ազատություն»-ից դարձել եք «0004 շրջաբերական» գրող կուսակցություն։ Դուք «Մահ կամ ազատություն» գոռացողներից դարձել եք՝ «չէ-չէ-չէ, ի՞նչ անկախություն, դա վտանգավոր է»։ Դուք «Մահ կամ ազատություն» գոչողներից դարձել եք ԿԳԲ գործակալ պաշտպանողի։ Դուք «Մահ կամ ազատություն» գոռացողից դարձել եք Գյումրիում Կոմունիստական կուսակցության հետ կոալիցվողի։ Վերհիշե՛ք ձեր արմատները, սիրելիներս»,- նշեց ԱԺ փոխխոսնակը։

Մանրամասները՝ տեսանյութում։