21.05.2026 | 10:23
Հ1-ը կիբերհարձակման է ենթարկվել․ թիրախը եղել է ԵՔՀ-ի գագաթնաժողովը․ Հ1
Աստղագետ Վլադիմիր Հայրապետյանը՝ ՆԱՍԱ-ի Goddard Center Director’s Award-ի դափնեկիր
Հասարակություն
12.02.2026 | 12:49
Վիկտոր Համբարձումյանի անվան Բյուրականի աստղադիտարանից հայտնում են, որ աստղադիտարանի արտասահմանյան խորհրդատու Վլադիմիր Հայրապետյանը 2025 թվականին իրականացրած գիտական գործունեության համար արժանացել է ՆԱՍԱ-ի Գոդարդի տիեզերական թռիչքների կենտրոնի տնօրենների մրցանակին:
Հայ գիտնականը Goddard Center Director’s Award-ի մրցանակակիր է ճանաչվել արեգակա-աստղային ֆիզիկայի ոլորտում ուսումնասիրություններում բացառիկ առաջընթաց գրանցելու համար: Նրան հաջողվել է ցույց տալ, թե երիտասարդ Արեգակից ծագող հզոր պայթյունները ինչպես կարող էին խթանել կյանքի կառուցողական տարրերի ձևավորումը վաղ Երկրի վրա։
Վլադիմիր Հայրապետյանը վերջին շրջանում ունեցել է գիտական մի շարք ձեռքբերումներ: Մասնավորապես, Nature Astronomy հանդեսում հրապարակվել է երիտասարդ Արեգակի անալոգ աստղերից դիտված աստղային պայթյուններին նվիրված նրա աշխատությունը: Նույն հանդեսում տպագրված մեկ այլ հոդված վերաբերում է նոր ձևավորվող գիտական ուղղությանը՝ հելիոբիոլոգիային։
Chandra ռենտգենյան աստղադիտակի միջոցով իրականացված հետազոտության միջոցով էլ հայ աստղագետը բացահայտել է երիտասարդ Արեգակների ռենտգենյան ճառագայթման էվոլյուցիան։
Վլադիմիր Հայրապետյանը ՆԱՍԱ-ի Գոդարդի տիեզերական թռիչքների կենտրոնի հելիոֆիզիկայի գիտական բաժնի ավագ գիտաշխատող է, պրոֆեսոր, Ճապոնիայի Կիոտոյի համալսարանի վաստակավոր պրոֆեսոր, աստղաֆիզիկայի գիտությունների թեկնածու:
