28.10.2026 | 14:34
Դավթաշենում 49-ամյա տղամարդու տնից հայտնաբերվել է 36 թուփ կանեփ և 9 կգ չորացված զանգված
2026-ի հունվարին զբոսաշրջիկների ռեկորդ ենք ունեցել, ճի՞շտ եմ ասում. Փաշինյան․ ՏԵՍԱՆՅՈՒԹ
Տնտեսություն
12.02.2026 | 12:27
Կառավարության որոշմամբ զբոսաշրջային գործունեություն իրականացնող բոլոր սուբյեկտները պարտավոր են գրանցվել և հայտարարագրել իրենց գործունեությունը։
«Այսինքն՝ զբոսաշրջային գործունեություն ծավալելու իրավունք կունենան միայն այն կազմակերպությունները, որոնք դրա մասին կհայտարարեն։ Դա տեղի է ունենալու թվային եղանակով»,- Կառավարության նիստին ասաց Էկոնոմիկայի նախարար Գևորգ Պապոյանը։ Նրա խոսքով՝ համապատասխան փաստաթղթերը կստուգվեն, որից հետո կհանձնվեն հավաստագրեր այն կազմակերպություններին, որոնք կարող են աշխատել։
«Եթե չեն համապատասխանի պահանջներին, կենթարկվեն վարչական և քրեական պատասխանատվության»,- նշեց նա։
Պապոյանը հավելեց, որ բոլոր սուբյեկտների համար գործելու է նաև բալային համակարգ․ նախապես կտրվի 20 բալ, որը խախտումների դեպքում կնվազի։
ՀՀ վարչապետ Նիկոլ Փաշինյանը նշեց, որ այս որոշումը զբոսաշրջության ոլորտում նոր ստանդարտ սահմանելու մասին է։ Նրա խոսքով՝ զբոսաշրջության ծավալներն աճում են, իսկ ծառայությունների մեծ մասը ձեռք է բերվում առցանց։
«Այսօր մարդն առցանց հարթակում տեսնում է առաջարկվող ծառայությունը, և շատ դեպքերում ֆոտոշոփը մեծ ազդեցություն է ունենում։ Մարդը չի գնում սենյակի դուռը բացի նայի ու հետո որոշի, այլ օնլայն է գնում ծառայությունը, բայց հաճախ իրականությունն ու համացանցային գովազդը էապես տարբերվում են»,- ասաց Փաշինյանը՝ ընդգծելով, որ առաջարկվող ծառայությունները պետք է ներկայացվեն իրականությանը համապատասխան։
Վարչապետը նաև հայտարարեց, որ 2026 թվականի հունվարին Հայաստանը զբոսաշրջության ոլորտում նոր ռեկորդ է գրանցել։
«Ռեկորդը թարմացվեց․ 2026-ի հունվարը լավագույն հունվարն է բոլոր հունվարների մեջ։ Երբևէ հունվարին 179 400 զբոսաշրջիկ չի եղել Հայաստանում։ Սա 29 տոկոսով ավելի է նախորդ տարվա հունվարի համեմատ»,- ասաց նա։
Փաշինյանը հորդորեց Ամանորի տոնակատարությունները դիտարկել որպես զբոսաշրջային ապրանք, քանի որ օտարերկրյա զբոսաշրջիկների հետաքրքրությունը տարեցտարի աճում է տոները Հայաստանում անցկացնելու նկատմամբ։
Մանրամասները` տեսանյութում։
