10.09.2026 | 11:35
Թրամփը հայտարարել է, որ Իրանի հետ պատերազմը կավարտվի ԱՄՆ միջանկյալ «ընտրություններից անմիջապես հետո»
Շվեյցարիայում ՀՀ դեսպանությունը Ժնևից տեղափոխվելու է Բեռն․ ծախսվելու է 196 մլն դրամ
Քաղաքականություն
11.02.2026 | 23:01
ՀՀ ԱԳ նախարար Արարատ Միրզոյանի այցը Ժնև
Հայաստանի Հանրապետությունը նախատեսում է Շվեյցարիայի Համադաշնությունում գործող իր դեսպանությունը Ժնևից տեղափոխել երկրի մայրաքաղաք Բեռն։ Համապատասխան նախագիծը մշակվել է ՀՀ արտաքին գործերի նախարարության կողմից։
Հայաստան–Շվեյցարիա դիվանագիտական հարաբերությունները հաստատվել են 1992 թվականի ապրիլի 30-ին, և այդ ժամանակից ի վեր երկկողմ հարաբերությունները զարգացել են բարեկամության, կառուցողական համագործակցության և փոխըմբռնման մթնոլորտում։ Հայաստանը կարևորում է Շվեյցարիայի հետ կապերի շարունակական խորացումն ու ընդլայնումը բոլոր փոխադարձ հետաքրքրություն ներկայացնող ոլորտներում։
2002 թվականից Ժնևում գործում է ՀՀ դեսպանությունը, ինչպես նաև ՄԱԿ-ի գրասենյակում և այլ միջազգային կազմակերպություններում ՀՀ մշտական ներկայացուցչությունը։ Նույն ներկայացուցիչը համատեղության կարգով հավատարմագրված է նաև որպես Շվեյցարիայում ՀՀ դեսպան։
Սակայն, հաշվի առնելով Բեռնի և Ժնևի միջև հեռավորությունը, ինչպես նաև երկկողմ և բազմակողմ օրակարգերի առանձնահատկությունները, առաջացել է անհրաժեշտություն դեսպանությունը տեղափոխել Բեռն։ Նշվում է, որ Շվեյցարիայում հավատարմագրված շուրջ 100 երկրների դեսպանություններ, այդ թվում՝ Ադրբեջանի, Թուրքիայի, Իրանի և Վրաստանի, տեղակայված են հենց մայրաքաղաքում։
Ըստ հիմնավորման՝ դեսպանության տեղափոխումը Բեռն հնարավորություն կտա առավել արդյունավետ շփվել դիվանագիտական կորպուսի ներկայացուցիչների հետ, ակտիվացնել քաղաքական երկխոսությունը և խթանել երկկողմ համագործակցության զարգացումը։
Միևնույն ժամանակ, Ժնևում կշարունակի գործել ՄԱԿ-ի գրասենյակում և այլ միջազգային կազմակերպություններում ՀՀ մշտական ներկայացուցչությունը։
Դեսպանության տեղափոխման հետ կապված տարեկան ծախսերը գնահատվել են շուրջ 344.8 հազար շվեյցարական ֆրանկ, որն այս պահի փոխարժեքով համարժեք է 165 մլն դրամի։ Առաջին տարվա համար նախատեսվում է նաև լրացուցիչ 62.8 հազար շվեյցարական ֆրանկ կամ 30 մլն դրամի չափով ծախս՝ կահույքի, տեխնիկայի ձեռքբերման, դեպոզիտի և միջնորդավճարների համար։
Այս փոփոխությունների արդյունքում 2026 թվականի պետական բյուջեով նախատեսվում է ԱԳՆ համապատասխան ծրագրի ծախսերն ավելացնել 407.5 հազար շվեյցարական ֆրանկով կամ 196 մլն դրամով, իսկ հաջորդ տարիներին՝ տարեկան 304.8 հազար շվեյցարական ֆրանկով, որն այս պահի փոխարժեքով կազմում է 146 մլն դրամ։
Այս տարի Ժնևից Բեռն դեսպանատան տեղափոխմանը դեմ է ՀՀ ֆինանսաների նախարարությունը։ Ըստ գերատեսչության՝ սա լրացուցիչ ծախս է, ինչը նախատեսված չէ 2026-ի պետական բյուջեով։ Ֆինանսների նախարարությունն առաջարկում է հարցը դիտարկել 2026 թվականի բյուջետային գործընթացի շրջանակներում՝ պետական բյուջեում լրացուցիչ ֆինանսական միջոցների առկայության դեպքում: Այս առաջարկը ՀՀ ԱԳՆ-ն չի ընդունել։
Նարեկ Կիրակոսյան
