Ամերիկացի ըմբիշ և բլոգեր Ջորջիո Պուլասը խոսել է UFC-ի թեթև քաշային կարգի դասակարգման երկրորդ համար Արման Ծառուկյանի հետ մենամարտի սպասելիքների մասին։ Նրանք ըմբշամարտի մենամարտ են անցկացնելու փետրվարի 28-ին ԱՄՆ-ի Արիզոնա նահանգի Տեմպե քաղաքում կայանալիք RAF (Real American Wrestling) լիգայում։
«Ծառուկյանի թիմը շատ լավ է աշխատում, նա մեծ առաջընթաց է գրանցում մեդիայում։ Հիմա նրա ճանաչելիությոունն աճում է։ Հենց դրա համար էլ ես ուզում եմ պարզել հարաբերությունները նրա հետ։ Ես չէի կարող բաց թողնել նման հնարավորությունը, դա վերևից տրված նվեր է։ Արմանը լավ ըմբիշ է, բայց ես ըմբշամարտով զբաղվում եմ ամբողջ կյանքում։ Եվ ես արդեն հանդիպել եմ նրանից շատ ավելի ուժեղ ըմբիշների։
Ես երբեմն դիտում եմ UFC, բայց գրեթե ոչինչ չգիտեի Ծառուկյանի մասին։ Նա մարտիկ է, ոչ թե ըմբիշ։ Իսկ ըմբշամարտն իմ տարերքն է։ Ծառուկյանը հիանալի հանդես եկավ Փալմերի դեմ, բայց Լենսն իրեն նման չէր։ Ինձ համար դժվար կլինի զսպել Ծառուկյանին, բայց ես շարունակում եմ հավատալ, որ նա չի կարողանա գետնին տապալել ինձ։ Ես պատրաստ եմ 1000 դոլար տալ յուրաքանչյուր հաջողված թեյքդաունի համար»,- MMA Junkie-ի հետ հարցազրույցում ասել է Ջորջիո Պուլասը։
Հիշեցնենք, որ 29-ամյա Ծառուկյանը RAF-ում առաջին մենամարտն անցկացրել էր հունվարի 10-ին՝ ժամկետից շուտ 10։0 հաշվով հաղթելով 38-ամյա ամերիկացի Լենս Փալմերին։ Հայաստանի ներկայացուցիչը խառը մենամարտերում մասնակցել է 26 հանդիպման, տարել 23 հաղթանակ ու կրել 3 պարտություն։
