Նախագիծը գալիս է իշխանությանը ոչ հաճո TV-ների վրա սահմանափակում դնելու համար․ Մանուկյան․ ՏԵՍԱՆՅՈՒԹ

«Միջամտությունը ո՞րն եք համարելու. կո՞չ, ենթադրենք, քաղաքական իրականությունը փոխելու, իշխանություն փոխելու, թե՞ ուղղակի Հայաստանում տեղի ունեցող որևէ իրադարձության լուսաբանումը»,- «Տեսալսողական մեդիայի մասին» օրենքում նախատեսվող փոփոխությունների քննարկման ժամանակ նշեց պատգամավոր Գեղամ Մանուկյանը։

Օրենքի նախագծով արգելվում է օտարերկրյա տեսալսողական ծրագրերում՝ Հայաստանի Հանրապետության ներքաղաքական կյանքին միջամտության բովանդակության տարածումը: Արգելվում է նաև պետության հայտարարած սգո և հիշատակի օրերին հեռարձակողների կողմից զվարճալի հաղորդումների և գովազդի հեռարձակումը:

Ի պատասխան Մխիթար Հայրապետյանը նշեց․ «Ես համարում եմ, որ կառավարությունը որևէ հեռուստահաղորդման կամ ծրագրի գնահատական տալու իրավունք չունի, այսինքն՝ կառավարությունը չէ այն սուբյեկտը, որ պիտի համարի կամ գնահատական տա՝ դա միջամտություն է, թե միջամտություն չէ: Դրա համար կան հստակ տարանջատված մարմիններ՝ սահմանադրական մարմին, որը կարգավորող մարմին է:

Իշխանությունը, կառավարությունը տվյալ պարագայում ընդամենը քաղաքականություն է մշակում, ասում է, որ կարգավորող մարմինը հետայսու օրենքով պիտի ունենա նման իրավունք, եթե համարում է, որ կոնկրետ դիրեկտիվների հիման վրա խախտվել են այս կամ այն օրենքները կամ կանոնները։ Դրանք ենթաօրենսդրական ակտեր են, գտնվելու են Հեռուստատեսության և ռադիոյի հանձնաժողովի տիրույթում, այսինքն՝ դրանց հիման վրա են այդ գնահատականները տրվելու»։

ՀՀ ներքաղաքական կյանքին միջամտող հեռուստաբովանդակություն է համարվում, ըստ նախարարի, այն տեղեկատվական-վերլուծական կամ քարոզչական բնույթի հաղորդումը, որը ուղղակի կամ անուղղակի կերպով նպատակ ունի ազդել ՀՀ ներքաղաքական գործընթացների վրա, այդ թվում՝ պետական իշխանության ձևավորման, ընտրությունների կամ հանրաքվեների, քաղաքական կուսակցությունների կամ շարժումների գործունեության, հանրային կարծիքի ձևավորման՝ ներքին քաղաքական հարցերի վերաբերյալ, ստեղծվում, ֆինանսավորվում կամ խմբագրվում է օտար պետության, օտար պետական մարմնի կամ դրանց հետ փոխկապակցված կազմակերպության կողմից և չի հանդիսանում չեզոք տեղեկատվության փոխանցում, այլ պարունակում է քաղաքական դիրքորոշման քարոզ, կոչեր՝ գործողության կամ դիմադրության, պետական ինստիտուտների լեգիտիմության խաթարում, կոնկրետ քաղաքական ուժի կամ գործչի աջակցություն կամ վարկաբեկում:

Մանրամասները՝ տեսանյութում։