Վենսի գրասենյակը հայտարարել է, թե Հայոց ցեղասպանության մասին ջնջված գրառումը «սխալմամբ է ուղարկվել»

ԱՄՆ փոխնախագահ Ջեյ Դի Վենսի գրասենյակը հայտարարել է, որ այժմ ջնջված գրառումը, որում 1915 թվականի հայերի զանգվածային սպանությունները նշվում էին որպես ցեղասպանություն, «սխալմամբ է ուղարկվել», գրում է Bloomberg-ը։

Վենսի պաշտոնական X-ի էջում հրապարակվել էր փոխնախագահի և նրա տիկնոջ լուսանկարը Ծիծեռնակաբերդի հուշահամալիրում, որը հետագայում հեռացվել է։ Այնտեղ ասվում էր, որ նրանք «մասնակցել են ծաղկեպսակ դնելու արարողությանը Հայոց ցեղասպանության հուշահամալիրում՝ ի հիշատակ 1915 թվականի Հայոց ցեղասպանության զոհերի»։

Փոխնախագահի գրասենյակի պաշտոնյան ասել է, որ նամակը սխալմամբ ուղարկվել է աշխատակազմի անդամի կողմից, որը ԱՄՆ պատվիրակության մաս չի կազմում:

Իր հերթին, Սպիտակ տան մամուլի քարտուղար Քերոլայն Լիվիթը ճեպազրույցի ժամանակ X-ի գրառման և այն հետագա ջնջելու վերաբերյալ հարցին պատասխանելիս ասել է, որ «քաղաքականության մեջ այս պահին որևէ փոփոխություն չի եղել»։

Bloomberg-ը գրում է, որ նախկին նախագահ Ջո Բայդենը դարձել է ԱՄՆ առաջին նախագահը, որը 2021 թվականին պաշտոնապես ճանաչել է կոտորածները որպես ցեղասպանություն: Այս քայլը վրդովեցրել է Թուրքիային՝ Օսմանյան կայսրության իրավահաջորդ պետությանը, որի օրոք իրականացվել է ցեղասպանությունը: Թուրքիայի նախագահ Ռեջեփ Թայիփ Էրդողանը քննադատել է այլ երկրներին, որոնք ճանաչել են սպանությունները որպես ցեղասպանություն, ասվում է հրապարակման մեջ։

Երևանում լրագրողների հարցին, թե ինչու է կարևոր համարում այցելել հուշահամալիր և արդյո՞ք դա նշանակում է, որ պաշտոնապես ճանաչում է Հայոց ցեղասպանությունը, ԱՄՆ փոխնախագահը պատասխանել է, որ հայերը խնդրել են իրեն այցելել հուշահամալիր, սակայն չի ասել՝ արդյո՞ք ճանաչում է ցեղասպանությունը:

«Երբ մենք խոսեցինք հայերի հետ, նրանք ասացին, որ սա մեզ համար շատ կարևոր վայր է, և ակնհայտ է, որ ես առաջին փոխնախագահն եմ, ով երբևէ այցելել է Հայաստան, նրանք խնդրեցին մեզ այցելել այդ վայրը։ Ակնհայտ է, որ շատ սարսափելի բան է տեղի ունեցել։ Դա մի բան է, որը պարզապես շատ, շատ կարևոր է նրանց համար մշակութային առումով։ Ես մտածեցի, որ որպես հարգանքի նշան՝ թե՛ զոհերի, թե՛ նա  Հայաստանի կառավարության նկատմամբ, որը մեզ համար շատ կարևոր գործընկեր է տարածաշրջանում, վարչապետ Նիկոլ Փաշինյանի, ես ցանկացա այցելել և իմ հարգանքի տուրքը մատուցել»,- ասել է նա:

Վենսի խոսնակը նշել է, որ X-ի հաշիվը վարում է անձնակազմը և գոյություն ունի հիմնականում փոխնախագահի գործունեության լուսանկարները և տեսանյութերը տեղադրելու համար, և հարցերը վերաուղղել է Վենսի մեկնաբանություններին։

Թարգմանությունը՝ Էմմա Չոբանյանի