Սեղանին է մնացել 300 000 ադրբեջանցու վերադարձի պահանջը․ ենթադրում եմ իշխանությունը կհամաձայնվի ընտրություններից հետո․ Դավիթ Խաժակյան. ՏԵՍԱՆՅՈՒԹ

«Լուսավոր Հայաստան» կուսակցության փոխնախագահ Դավիթ Խաժակյանը Factor TV-ին տված հարցազրույցում գնահատելով ԱՄՆ փոխնախագահի այցի նշանակությունը՝ ընդգծել է դրա աննախադեպ բնույթը։ «Պետք է ասել, որ պատմականորեն տարածաշրջանում երկրորդ բարձրաստիճան այցն էր Վենսի այցելությունը։ Առաջինը եղել է 2005 թվականին Վրաստան, Ջորջ Բուշի այցելությունը՝ Թբիլիսի, և հիմա երկրորդ դեմքի, այսինքն փոխնախագահի մակարդակով է այց կատարվում՝ ԱՄՆ փոխնախագահի ներկայացվածությամբ դա Հայաստան և Ադրբեջան այցն է»,- նշել է նա։

Խաժակյանի համոզմամբ, ԱՄՆ-ն ներգրավված է ՀՀ-Ադրբեջան պրոցեսում, ինչի վկայությունն է այս այցը։ «Ես ելակետը վերցնում եմ այն, որ Հայաստանի և Ադրբեջանի երկկողմ բանակցությունների արդյունքը, որը ստորագրվեց Վաշինգտոնում, որտեղ Դոնալդ Թրամփը որպես վկա հանդես եկավ այդ փաստաթղթին, և, իհարկե, ԹՐԻՓՓ-ի գործոնը, որը հիմնական այսպես, չասենք տնտեսական հետաքրքրությունն է, բայց այն գործոնն է, որը ապահովում է ԱՄՆ-ի որոշակի ներգրավվածություն»,- պարզաբանել է նա։

Անդրադառնալով «Խաղաղության խաչմերուկ» նախագծի շրջանակում սահմանային հսկողության իրականացման մեխանիզմին՝ Խաժակյանը այն որակել է աննախադեպ։ «Ամբողջ աշխարհում նման նախադեպ գոյություն չունի։ Սա առաջին դեպքն է, որ տվյալ պետության սահմանային ծառայություն իրականացնող անձը չի վերցնելու անձնագիրը իր երկրի սահմանը հատած անձից»,- նշել է նա՝ պարզաբանելով, որ այսպես կոչված «ֆրոնտ օֆիսում» մասնավոր կազմակերպությունը միայն ստանալու է փաստաթղթերը և փոխանցելու «բեք օֆիս», որտեղ հայ սահմանապահը, առանց քաղաքացու հետ ուղիղ շփման, պետք է իրականացնի անձնագրային հսկողություն։

Նրա խոսքով՝ այս մոդելը Հայաստանի զիջման արդյունք է՝ Ադրբեջանի կողմից «անխոչընդոտ ճանապարհի» պահանջը բավարարելու համար։

Դավիթ Խաժակյանը քննադատել է ընդդիմադիր դաշտի մասնատվածությունը 2026 թվականի խորհրդարանական ընտրություններին ընդառաջ։ Նա նշել է, որ «Լուսավոր Հայաստան»-ը դեռևս 2024-ի ավարտին հայտարարել էր, որ նախընտրելի է ընդդիմության մասնակցությունը «մեծ բևեռով», սակայն այսօր իրավիճակն այլ է։ «Բոլորը կարծում են, որ իրենք այնքան հզոր են, որ կարող են առանձին մասնակցել և անցնել։ Մենք էլ իրենց ասում ենք՝ դե գիտեք, եթե ձեր հաշվարկով դուք ունեք 10-20%, նույն հաշվարկի, նույն բանաձևով մենք էլ կարող ենք մեր ձայները ասենք 30% հաշվել»,- հեգնել է նա։

Խաժակյանը զգուշացրել է, որ ընդդիմության մասնատված մասնակցության դեպքում հնարավոր է ձայների «փոշիացում», ինչը կարող է իշխանությանը թույլ տալ ձևավորել մեծամասնություն՝ նույնիսկ ունենալով ձայների փոքրամասնությունը։ «Այս անգամ կարող է ստանալ 40-45%, բայց մանդատների թվով խորհրդարանում լինել մեծամասնություն։ Ինչ է, թե ընդդիմադիր ուժերը բոլորը կարծում են, որ իրենք այնքան հզոր են, որ կարող են առանձին մասնակցել», – մտահոգություն է հայտնել նա՝ առաջարկելով ընդդիմությանը միավորվել՝ իշխանությանը մարտահրավեր նետելու համար։

Հարցազրույցն ամբողջությամբ՝ տեսանյութում։

Ռոբերտ Անանյան