«Նոայի» նախագահ․ Մենք գերպատասխանատվություն ենք զգում այն ճանապարհի համար, որը հիմա անցնում ենք միասին

Ֆուտբոլի Հայաստանի չեմպիոն ու գավաթակիր «Նոայի» նախագահ Վարդգես Վարդանյանը նիդերլանդական «ԱԶ Ալկմար» դեմ Կոնֆերենցիաների լիգայի անցումային փլեյ-օֆֆ փուլի հանդիպումներից առաջ դիմել է երկրպագուներին:

«Մենք գերպատասխանատվություն ենք զգում այն ճանապարհի համար, որը հիմա անցնում ենք միասին։

Մարզադաշտը մարդիկ են, և մարդիկ են կերտում հաղթանակը՝ ձեռք ձեռքի։ Հենց դուք եք ստեղծում այն մթնոլորտը, որն ուժ է տալիս թիմին։

Երկրպագելու մշակույթը գերազանցության ճանապարհի կարևոր մասն է, և հենց ձեր շնորհիվ ենք այսօր այս կարևոր կետում։ Հիմա հերթը հաջորդ մարտահրավերինն է՝ կանգնել հայկական թիմի կողքին փլեյօֆում։

Գիտենք՝ ժամը ուշ է, ցուրտ է, բայց հեշտ ճանապարհներ չկան։

Սա է եվրոպական ֆուտբոլը՝ իր կանոններով ու իր շնչով։

Առաջին անգամ փետրվարին Հայաստանում անցկացվում է միջազգային հանդիպում, և այս մասին կարող էինք միայն երազել։

Եկեք մարզադաշտ՝ աջակցելու թիմին և մեր դրոշին։ Այս կռիվը Հայաստանի համար է, հայկական ֆուտբոլի ու հայկական դրոշի։ Այս կռվում դուք եք մեր հենման կետը, և մենք սպասում ենք տեսնել լեփ-լեցուն ու միասնական մարզադաշտ»,- ֆեյսբուքյան էջում գրել է Վարդգես Վարդանյանը։

«Նոայի» ու «Ազ Ալկմարի» դիմակայության առաջին խաղը կկայանա փետրվարի 19-ին Երևանում, իսկ պատասխան հանդիպումը՝ մեկ շաբաթ անց Նիդերլանդներում։ Հաղթողը 1/8 եզրափակիչում կմրցի կամ Աթենքի ԱԵԿ-ի (Հունաստան), կամ Պրահայի «Սպարտայի» (Չեխիա) հետ։

Հիշեցնենք, որ Կոնֆերենցիաների լիգայի նախորդ 6 խաղում «Նոան» հաղթել էր խորվաթական «Ռիեկային» (1։0) ու լեհական «Լեգիային» (1։0), ոչ-ոքի խաղացել ռումինական «Ունիվերսիտատեա Կրայովայի» (1։1) ու շոտլանդական «Աբերդինի» (1։1) հետ, պարտվել Չեխիայի գավաթակիր «Սիգմային» (1։2) ու Ուկրաինայի չեմպիոն Կիևի «Դինամոյին» (0։2) և 8 միավորով գրավել 19-րդ տեղը։