Քաղաքականություն
10.02.2026 | 13:04
Երկօրյա պաշտոնական այցով ՀՀ ժամանած ԱՄՆ փոխնախագահ Ջեյմս Դի Վենսը և ՀՀ վարչապետ Նիկոլ Փաշինյանը երեկ ստորագրեցին խաղաղ միջուկային համագործակցության շուրջ հայտարարությունը։ Կողմերն այսպիսով արձանագրեցին «Միջուկային էներգիայի խաղաղ նպատակներով օգտագործման ոլորտում Հայաստանի Հանրապետության կառավարության և Ամերիկայի Միացյալ Նահանգների կառավարության միջև համագործակցության մասին» համաձայնագրի բանակցությունների ավարտը։
Ստորագրմանը հաջորդած համատեղ հայտարարության ընթացքում Ջեյ Դի Վենսի հայտարարությունը ՀՀ էներգետիկայի ոլորտում ներդրումների մասին տարընթերցումների տեղիք է տվել՝ բանավոր թարգմանության ընթացքում թարգմանչի ձևակերպումների համատեքստում։ Հատկապես հարցեր են առաջացրել 5 մլրդ և 4 մլրդ դոլար թվերը։
Ստորև ներկայացնում ենք Վենսի հայտարարության պաշտոնական թարգմանության՝ էներգետիկ համագործակցությանը վերաբերող հատվածը, որը հրապարակել է ՀՀ վարչապետի գրասենյակը։
«Մենք նաև շատ հպարտ ենք հայտարարել, որ մեր երկրներն ավարտել են քաղաքացիական միջուկային համագործակցության 1-2-3 համաձայնագրի շուրջ բանակցությունները։ Երբ այն ամբողջությամբ հաստատվի, դա կհարթի ճանապարհն ամերիկյան և հայկական ընկերությունների համար՝ կնքելու քաղաքացիական միջուկային նախագծերի վերաբերյալ համաձայնագրեր։ Դա նշանակում է մինչև 5 միլիարդ դոլար սկզբնական ամերիկյան արտահանում, գումարած լրացուցիչ 4 միլիարդ դոլարի երկարաժամկետ աջակցություն վառելիքի և սպասարկման պայմանագրերի միջոցով։
Սա դասական փոխշահավետ գործարք է թե՛ Հայաստանի, թե՛ Ամերիկայի Միացյալ Նահանգների համար։ Սա նշանակում է ավելի ուժեղ էներգետիկ անվտանգություն իմ երկրի համար, և ես նաև կարծում եմ, որ դա նշանակում է ավելի ուժեղ էներգետիկ անվտանգություն Հայաստանի համար, և դա նաև կստեղծի բազմաթիվ նոր աշխատատեղեր ԱՄՆ-ում։ Սա նշանակում է փոքր մոդուլային ռեակտորներ, ամերիկյան տեխնոլոգիաները կգան այս երկիր։ Կրկին, սա այն քիչ երկրներից մեկն է, որտեղ մենք բավականաչափ վստահություն ունենք այս մակարդակում ներդրումներ կատարելու, այս տեսակի տեխնոլոգիաներ ուղարկելու հարցում, և սա տեղի է ունենում վարչապետի ղեկավարության շնորհիվ»,- ասել է ԱՄՆ փոխնախագահը։
Factor TV-ն էներգետիկ ոլորտում ԱՄՆ ներդրումների չափի վերաբերյալ նաև գրավոր հարցում է ուղարկել ԱՄՆ դեսպանություն։
