ՀՀ-ում ահագնացել են քաղաքական ճնշումները․ Էլինար Վարդանյան․ ՏԵՍԱՆՅՈՒԹ

«Հայաստանի Հանրապետությունում ահագնացել են քաղաքական ճնշումները»,- այս մասին ԱԺ լիագումար նիստի ժամանակ հայտարարել է «Հայաստան» խմբակցության պատգամավոր Էլինար Վարդանյանը և ներկայացրել «Հայաստանի Հանրապետությունում առկա քաղբանտարկյալների և նրանց խախտված իրավունքների վերականգնման մասին» հայտարարության նախագիծը։

Նրա խոսքով՝ անհերքելի է, որ այսօր կան քաղբանտարկյալներ, և դա ոչ միայն քաղաքական հայտարարություն է, այլ փաստարկված իրողություն։

«Իշխանությունը վերածվել է քաղաքական հետապնդումների, հալածանքների և հաշվեհարդարի բացահայտ գործիքի, իսկ կալանքը՝ մարդկանց պատժելու և երկրում վախի մթնոլորտ սերմանելու միջոցի։ Քաղաքական շարժառիթներով քրեական հետապնդման են ենթարկվում, կալանավորված կամ տնային կալանքի տակ են Հայաստանյայց Առաքելական եկեղեցու արքեպիսկոպոսներ, հոգևոր սպասավորներ և ծառայողներ։ Այս պահին կալանավորված են երեք հոգևոր թեմի առաջնորդ, և ընդամենը մի քանի օր առաջ չորրորդ թեմի առաջնորդ Միքայել սրբազանի կալանքը փոխարինվեց տնային կալանքով, որը նույնպես ազատության սահմանափակում է»,-նշել է նա։

Վարդանյանն ասել է՝ քրեական հետապնդման են ենթարկվում, կալանավորված կամ տնային կալանքի տակ են Հայրենիքի պաշտպանության գործում իրենց կյանքը նվիրաբերած զինծառայողների ընտանիքների անդամներ և հարազատներ, ընդդիմադիր քաղաքական կուսակցությունների անդամներ, քաղաքական և քաղաքացիական գործունեություն իրականացնող և իշխանություններին քննադատող անձինք, հասարակական և բարեգործական գործունեություն իրականացնող անձինք։

ԱԺ հանձնաժողովի նիստին բացասական եզրակացություն ստացած հայտարարության նախագծին կողմ քվեարկեց 21 պատգամավոր, դեմ՝ 52, ձեռնպահ՝ 1: Նախագիծը չընդունվեց:

Մանրամասները՝ տեսանյութում։