Ավինյանը դիմում է երևանցիներին․ «Վարձակալեք այն տարծքները, որոնց վրա ավտոտնակ եք կառուցել»․ ՏԵՍԱՆՅՈՒԹ

«Մենք պարբերաբար ստանում ենք ավտոտնակների, մետաղյա ավտոտնակների կամ որևէ տեսակի ավտոտնակների տակի հողի օրինականացման հայտեր, ինքնակամ շինությունների որոշման համաձայն և ստիպված ենք լինում մերժել այդ հայտերը, քանի որ դրանք մեծամասամբ գտնվում են ընդհանուր օգտագործման հողերի վրա»,- այս մասին քաղաքապետարանում գործակարգավարական խորհրդակցության ժամանակ նշել է Երևանի քաղաքապետ Տիգրան Ավինյանը։

Նրա խոսքով՝ գլխավոր հատակագծով հիմնականում բոլոր ավտոտնակները՝ վերգետնյա, գտնվում են ընդհանուր օգտագործման հողերի վրա։

«Եվ ընդհանուր օգտագործման հողերի վրա մենք ուղղակի հնարավորություն չունենք ինքնակամ շինություններ օրինականացնելու։ Դրա փոխարեն, ես առաջարկում եմ, հարգելի՛ գործընկերներ, սիրելի՛ երևանցիներ, կնքել հողի վարձակալության պայմանագրեր։ Այսինքն, բոլոր ավտոտնակները չեն, որ քանդման ենթակա են։ Եթե դուք կնքեք վարչական շրջանի հետ հողի վարձակալության պայմանագիր Ձեր գործող ավտոտնակի համար, դուք այդ ավտոտնակը կկարողանաք շահագործել այս տրամաբանությամբ։

Խոսքը չի գնում միայն այն ավտոտնակների մասին, որոնք որ ոչ մի տեղ, ոչ մեկին չեն խանգարում, չգիտեմ, խաղահրապարակի փոխարեն չեն, բայց նաև մենք ուղղակիորեն այլընտրանք չենք ունենում, քանի որ եթե մենք ստանում ենք ինքնակամ շինության օրինականացման հայտ, ստիպված ենք լինում և՛ մերժել, և՛ ստիպված պետք է լինենք հետո մերժման դեպքում քանդել»,- նշել է Ավինյանը։

Մանրամասները՝ տեսանյութում։