18.08.2026 | 16:48
«Փաշինյանը հայերենի հրաշալի իմացություն ունի». Ռուզաննա Երեմյանը՝«կզացնել»,«չոքացնել» խոսույթի մասին․ ՏԵՍԱՆՅՈՒԹ
Գարեգին Բ կաթողիկոսն ընդունել է գնդերեցներին
07.02.2026 | 12:54
Մայր Աթոռ Սուրբ Էջմիածնից հայտնում են, որ փետրվարի 6-ին Ն.Ս.Օ.Տ.Տ. Գարեգին Բ կաթողիկոսն ընդունել է գնդերեց քահանա հայրերին, որոնց ծառայությունը ՀՀ ԶՈՒ-ում դադարեցվել է փետրվարի 1-ից։
«Նորին Սրբությունն իր գնահատանքն ու հայրական օրհնությունը բերեց հոգևոր հայրերին՝ գոհունակությամբ անդրադառնալով նրանց նվիրյալ ծառայությանը՝ ի նպաստ հայոց բանակում հոգևոր-բարոյական առողջ մթնոլորտի ձևավորման, զինվորականների հավատքի, առ հայրենին սիրո և մարտական ոգու զորացման։
Հանդիպմանն Ամենայն Հայոց Կաթողիկոսը կատարեց նաև հոգևոր սպասավորների նոր նշանակումներ՝ հորդորելով քահանա հայրերին նույն նվիրումով և հանձնառու ոգով շարունակել հոգեփրկչական իրենց առաքելությունը ծառայության նոր վայրերում»,- ասված է հաղորդագրությունում։
Հիշեցնենք, որ ավելի քան երկու տասնամյակ Հայաստանի զինված ուժերում ծառայող գնդերեցների կարգավիճակը փոխվել է․ պաշտպանության նախարարի նոր հրամանով՝ բանակի հոգևոր ծառայությունը դուրս է բերվել Մայր Աթոռ Սուրբ Էջմիածնի ենթակայությունից։ Նախարարի հրամանով սահմանվել է, որ զորակոչված զինծառայողները և զինվորական պաշտոնի նշանակված գնդերեցները հոգևոր ծառայությունը շարունակելու են իրականացնել Գլխավոր շտաբի բարոյահոգեբանական ապահովման վարչության համակարգմամբ և իրենց ծառայության զորամասի հրամանատարի ենթակայությամբ։
