28.06.2026 | 21:45
Քննարկվում է դիզելային վառելիքի արտահանման ամբողջական արգելքի հնարավորությունը․ Պուտին
100% սուբսիդավորում և AWS փորձագիտական աջակցություն՝ ԲՏԱ նախարարության նոր ծրագրում
06.02.2026 | 17:50
Փետրվարի 5-ին ՀՀ բարձր տեխնոլոգիական արդյունաբերության նախարարությունում տեղի է ունեցել հանդիպում՝ արհեստական բանականության ոլորտում բարձր արտադրողականությամբ հաշվողական ռեսուրսներին հասանելիության ապահովման պետական աջակցության ծրագրի ներկայացման նպատակով: Հանդիպումն իրականացվել է ՀՀ ԲՏԱ նախարարության և Amazon Web Services (AWS)-ի համատեղ նախաձեռնությամբ։ Այս մասին հայտնել են ԲՏԱ-ն։
Նշվում է, որ հանդիպմանը մասնակցել են տեխնոլոգիական համայնքի ներկայացուցիչներ, ստարտափներ, գիտահետազոտական խմբեր, ուսանողներ և ոլորտի մասնագետներ։
«Միջոցառման ընթացքում ՀՀ ԲՏԱ նախարարի առաջին տեղակալ Գևորգ Մանթաշյանը ներկայացրել է նախաձեռնության ռազմավարական տեսլականը, ծրագրի նպատակներն ու գործնական մեխանիզմները՝ ընդգծելով, որ այն նախարարության առանցքային ռազմավարական նախաձեռնություններից է և ուղղված է Հայաստանում արհեստական բանականության էկոհամակարգի կայուն ու երկարաժամկետ զարգացմանը։ Նա անդրադարձել է պետական աջակցության ձևաչափին, շահառուների ընտրության սկզբունքներին, ինչպես նաև այն հնարավորություններին, որոնք ծրագիրը ստեղծում է հետազոտողների, ուսանողների, ստարտափների և տեխնոլոգիական ընկերությունների համար։
Գևորգ Մանթաշյանը նշել է, որ փորձնական ծրագրի շրջանակում ընտրված շահառուների կողմից փաստացի օգտագործված բարձր արտադրողականությամբ հաշվողական ռեսուրսների արժեքը կսուբսիդավորվի 100 տոկոսով, ինչպես նաև կտրամադրվի AWS-ի տեխնիկական փորձագիտական աջակցությունը։ Նա կարևորել է նաև Արհեստական բանականության վիրտուալ ինստիտուտի դերը՝ որպես հայտերի ընդունման, դիմողների նույնականացման և ռեսուրսների բաշխման գործառնական հարթակ, ինչպես նաև որպես համագործակցության և գիտելիքի փոխանակման վիրտուալ միջավայր։
Հանդիպման ավարտին տեղի է ունեցել հարցուպատասխան, որի ընթացքում մասնակիցները ստացել են պարզաբանումներ ծրագրին մասնակցության պայմանների, պահանջների և կիրառման ընթացակարգերի վերաբերյալ։ Քննարկվել են նաև արհեստական բանականության ոլորտում առկա ենթակառուցվածքային մարտահրավերները և դրանց հաղթահարման գործում պետական-մասնավոր համագործակցության կարևորությունը։
Հիշեցնեք, որ ԱԲ ոլորտում բարձր արտադրողականությամբ հաշվողական ռեսուրսներին հասանելիության ապահովման պետական աջակցության փորձնական ծրագիրն իրականացվում է Amazon Web Services (AWS) ընկերության հետ համագործակցությամբ՝ Արհեստական բանականության վիրտուալ ինստիտուտի շրջանակում»,- նշվում է հաղորդագրության մեջ։
