Տնային կալանք՝ քաղաքացուն հարվածած ոստիկանի նկատմամբ

Ոստիկանության ծառայող Հայկ Հակոբյանի նկատմամբ կիրառվել է տնային կալանք խափանման միջոց` երկու ամիս ժամանակով։ Այս մասին Factor.am-ին տեղեկացրել են ՀՀ քննչական կոմիտեից։

Գլխավոր դատախազությունից Factor TV-ի գրավոր հարցմանն ի պատասխան հայտնել էին, որ խոշտանգման հոդվածով հանրային քրեական հետապնդում է հարուցվել նրա նկատմամբ։ Այն հարուցվել է երեկ դատախազի կողմից՝ Քրեական օրենսգրքի 450-րդ հոդվածի 1-ին մասով։

Քննչական կոմիտեն առավել վաղ մանրամասներ էին հայտնել․

«Առերևույթ հանցանքի մասին հաղորդման առթիվ ՀՀ քննչական կոմիտեի հատկապես կարևոր գործերի քննության գլխավոր վարչության խոշտանգումների և պաշտոնատար անձանց կողմից բռնություն գործադրելով լիազորությունները չարաշահելու կամ անցնելու հանցագործությունների քննության վարչությունում նախաձեռնվել է քրեական վարույթ: Քրեական վարույթի նախաքննության ընթացքում ձեռք բերված փաստական տվյալների հիման վրա Հ.Հ.-ի նկատմամբ հարուցվել է հանրային քրեական հետապնդում՝ խոշտանգումը՝ պաշտոնատար անձի կողմից կամ նրա դրդմամբ, կարգադրությամբ կամ գիտությամբ որևէ անձի դիտավորությամբ ֆիզիկական ուժեղ ցավ կամ հոգեկան ուժեղ տառապանք պատճառելը` այդ կամ երրորդ անձից տեղեկություն կամ խոստովանություն ստանալու նպատակով հոդվածի հատկանիշներով: Որոշում է կայացվել վերջինիս ձերբակալելու մասին: Նախաքննությունը շարունակվում է»։

Նշենք, որ տեսանյութի տարածումից հետո միայն 3-րդ օրն է հայտնի դարձել քրեական վարույթի նախաձեռնման մասին։ Այդ ընթացքում իրավապաշտպանները մտահոգություն էին հայտնում, որ ոստիկանը կարող է այդ ընթացքում փորձել ազդել վկաների վրա։

Հիշեցնենք՝ փետրվարի 3-ին լրագրող Սյուզի Բադոյանը տեսանյութ տարածեց, որտեղ երևում էր, թե ինչպես է ոստիկանը հարվածելով, նվաստացնելով և հայհոյելով փորձում քաղաքացուց ցուցմունք կորզել։ Ըստ նախնական տեղեկությունների՝ դեպքը տեղի է ունեցել հոկտեմբերին։ Այս պահին իրավապահ մարմինները չեն մանրամասնում, թե ով է լուսանկարել և տարածել խոշտանգման կադրերը։