07.09.2026 | 15:57
Հայաստանն ու Վրաստանը քննարկել են նոր ուղիղ ավիաուղիների բացումը
«Ինտերը» դիտարկում է Հենրիխ Մխիթարյանին նոր պայմանագիր առաջարկելու տարբերակը
05.02.2026 | 12:26
Իտալական «Ինտերը» դիտարկում է Հայաստանի ազգային հավաքականի նախկին ավագ Հենրիխ Մխիթարյանին նոր պայմանագիր առաջարկելու տարբերակը, գրում է Calciomercato-ն։
37-ամյա կիսապաշտպանը մեկն է «Ինտերի» այն 5 ֆուտբոլիստներից, որոնց պայմանագրերն ավարտվում են այս մրցաշրջանի վերջում։ Պաշտպաններ Ստեֆան դե Վրեյը, Ֆրանչեսկո Աչերբին, Մատեո Դարմիանը և դարպասապահ Յան Զոմերը մեծ հավանականությամբ ամռանը կհեռանան իտալական ակումբից, իսկ Մխիթարյանն այլ իրավիճակում է, քանի որ թիմի գլխավոր մարզիչ Կրիստիան Կիվուն մեծ հույսեր է կապում նրա հետ։ «Ինտերը» քննարկում է հայ ֆուտբոլիստին կարճաժամկետ պայմանագիր առաջարկելու տարբերակը։
Հայաստանի հավաքականի պատմության լավագույն ռմբարկուն 2022 թվականից է խաղում «Ինտերում», որի կազմում դարձել է Իտալիայի չեմպիոն, գավաթակիր, սուպերգավաթակիր ու երկու անգամ խաղացել է Չեմպիոնների լիգայի եզրափակիչում։ Ընթացիկ մրցաշրջանում կիսապաշտպանը մասնակցել է 23 հանդիպման, դարձել 1 գոլի ու 2 գոլային փոխանցման հեղինակ։
Կարիերայի ընթացքում Հենրիխ Մխիթարյանը հանդես է եկել նաև Երևանի «Փյունիկում» (2006-2009 թթ.), Դոնեցկի «Մետալուրգում» (2009-2010 թթ.) ու «Շախտյորում» (2010-2013 թթ.), Դորտմունդի «Բորուսիայում» (2013-2016 թթ.), անգլիական «Մանչեսթեր Յունայթեդում» (2016-2018 թթ.) ու «Արսենալում» (2018-2019 թթ.), իտալական «Ռոմայում» (2019-2022 թթ.)։
