Դա նշանակում է՝ ամեն ինչ անել, որ TRIPP-ը չաշխատի․ Ալեն Սիմոնյանը՝ ՌԴ-ի՝ TRIPP-ին միանալու հավանականության մասին

TRIPP-ին ՌԴ-ի հավանական մասնակցությունը ՀՀ ԱԺ նախագահ Ալեն Սիմոնյանը համարում է «ամեն ինչ անել, որ TRIPP-ը չաշխատի։ Այս մասին ԱԺ նախագահն ասել է Factor TV-ին տված հարցազրույցում՝ պատասխանելով հարցին, թե հնարավո՞ր է, որ փետրվարի 5-ին ՌԴ պաշտոնական այցի շրջանակներում քննարկվի Ռուսաստանի TRIPP-ին միանալու հավանականությունը։

«TRIPP-ը հայ-ամերիկյան կազմակերպություն է, եթե մենք խոսում ենք նմանատիպ ինչ-որ երթուղու կամ նմանատիպ ինչ-որ ճանապարհ բացելու մասին, ըստ իս, դա պետք է լինի առանձին նախաձեռնություն, բայց TRIPP-ի շրջանակում դա մի քիչ աբսուրդային եմ համարում, որովհետև դա նշանակում է ամեն ինչ անել, որ TRIPP-ը հանկարծ չաշխատի»,- ասել է ԱԺ նախագահը։

Հիշեցնենք, որ ՌԴ արտգործնախարարության ներկայացուցիչ Մարիա Զախարովան ասել էր, որ Ռուսաստանը պատրաստ է քննարկել TRIPP -ին միանալու տարբերակը՝ հաշվի առնելով «ռուսական երկաթուղու եզակի փորձը»։

Հարցին՝ ի՞նչ է նշանակում Ռուսաստանի ցուցաբերած այս հետաքրքրությունը, Ալեն Սիմոնյանն ասել է․«Այդպիսի մեծ պետության գործելաոճ է, ոչ մի նոր բան և ոչ մի արտառոց բան չի նշանակում։ Բոլորն էլ հետաքրքրված են իրենց շրջապատող երկրներում իրենց ազդեցությունն ունենալ, և այդ ազդեցությունը, եթե ռազմական առումով արդեն հնարավոր չի ունենալ, բնական է, տնտեսական առումով է այդ ազդեցությունը»։

Դիտարկմանը, որ ՌԴ-ի քաղաքականութունը քննադատողներն ասում են, թե եթե խաղաղություն լինի, ապա Ռուսաստանի դերն այստեղ նվազում է և Ռուսաստանին դա ձեռք չի տալիս, ԱԺ նախագահն ասաց․
«Կարծում եմ, այդ էջը փակված է։ Հայաստանի և Ադրբեջանի միջև պատերազմի էջը փակված է։ Ես անհավանական եմ համարում, եթե կտրուկ ինչ-որ բաներ տեղի չունենան։ Անհավանական եմ համարում, որ այդ էջը մենք նորից բացենք, և այդ էջը ես համարում եմ փակված։ Նաև ես կարծում եմ, մեր մարդկանց ուղեղներում, և հույս ունեմ, որ Ադրբեջանի իշխանությունները նույնպես կարող են նման պնդում անել, որ իրենց մոտ էլ է այդ էջը, ըստ իս, փակված։ Այլ հարց է, եթե ինչ-որ մեկը փորձի ընտրություններից հետո, ընտրությունների ժամանակ, ինչ-որ իրողություն փոխել, որին նույնպես ես քիչ եմ հավատում, որովհետև տեսեք, այն, ինչ որ մենք հայտարարել ենք, այն, որ ղարաբաղյան էջը փակված է և խաղաղության դարաշրջան է, և այն, ինչ որ տեղի է ունեցել, ընդդիմադիր դաշտում, քաղաքական դաշտում, արձագանքի առումով, և հայ ժողովրդի արձագանքի առումով, իմ համար ակնհայտ է, որ այն խոսույթը, այն առաջարկը, չակերտավոր, որը որ մենք արել ենք, դա հանրության կողմից ընդունվել է և հաստատվել է, և ևս մեկ անգամ կհաստատվի 26 թվականի ընտրություններին»։

Նարեկ Կիրակոսյան