14.09.2026 | 15:30
Ռուբեն Ռուբինյանն ու Էստոնիայի դեսպանը քննարկել են ՀՀ–ԵՄ օրակարգն ու միջխորհրդարանական կապերի զարգացումը
Կրթության տեսչական մարմինը 2025-ին 101 ստուգում է իրականացրել․ Վաղարշակ Մատիկյան․ ՏԵՍԱՆՅՈՒԹ
Հասարակություն
02.02.2026 | 13:04
Կրթության տեսչական մարմինը 2025 թվականի ընթացքում իրականացրել է աշխատանքային գործունեության և տարեկան ստուգումների ծրագրերով նախատեսված բոլոր գործառույթները։ Այս մասին հրավիրված մամուլի ասուլիսի ժամանակ նշել է Կրթության տեսչական մարմնի ղեկավար Վաղարշակ Մատիկյանը։
«2025 թվականին տեսչական մարմինը իրականացրել է շուրջ 101 ստուգում։ Եթե կրկին
ըստ ոլորտների դրանք ներկայացնենք՝ 17 ստուգում իրականացվել է նախադպրոցական կրթության ոլորտում, 67 ստուգում իրականացվել է դպրոցներում, որոնցից 60-ը պլանային, ևս 7-ը՝ դիմում-բողոքների հիման վրա, և 17 ստուգում, որոնցից 15-ը պլանային, իրականացվել է մասնագիտական կրթության ոլորտում։
2025 թվականին տեսչական մարմինը ստացել է 195 դիմում-բողոք։ Դրանց ծանրակշիռ մասը՝ 159-ը, վերաբերել է դպրոցներին։ Ստացված դիմում-բողոքներից 77-ը բավարարվել է, 42-ը վերահասցեագրվել այլ մարմիններ, ևս 64-ի ուղղությամբ տրվել են պարզաբանումներ։ Մի մասը դեռևս ընթացքի մեջ է։ Այստեղ ցանկանում եմ մանրամասնել, որ վերահասցեագրված դիմում-բողոքների շարքում, բացի ԿԳՄՍՆ ուղղված դիմումներից, մի մասն ուղարկվել է նաև համապատասխան ուժային կառույցներ։ Դրանք հիմնականում կապված են ուսումնական հաստատություններում բռնությունների, դրամահավաքի և այլ դեպքերի հետ, որոնք դուրս են տեսչական մարմնի լիազորությունների շրջանակից»,-նշել է նա։
Մատիկյանի խոսքով՝ 2025 թվականին, 2024-ի նկատմամբ, այն խախտումների տոկոսը, որոնց ուղղությամբ տրվել է հանձնարարական, էապես աճել է։ Մասնավորապես՝ 2024 թվականին դա կազմել է 6%, իսկ 2025 թվականին՝ 37%։
Մանրամասները՝ տեսանյութում։
