Հղիանում են «ստերջացված» շները․ ովքեր ու որքան փողով են պայքարում բազմացման դեմ. ՏԵՍԱՆՅՈՒԹ

Կենդանապաշտպան Գոհար Տեր-Անտոնյանն ահազանգում է՝ ստերջացված լինելու տարբերանշան կրող շները հղիանում և շարունակում են բազմանալ։ «Դոգմա» կենդանապաշտպան հասարակական կազմակերպության ղեկավարը Factor TV-ին տեղեկացրեց, որ նման շներ են հայտնաբերվել Սիսիանում և Չարենցավանում։

Սիսիան և Չարենցավան համայնքներում շների ստերջացումը 2025 թվականի ընթացքում իրականացրել է «Վերոնիկա Հակոբյան» ԱՁ-ն։ Գնումների պետական համակարգից տեղեկացանք, որ ձեռնարկատերը երկու համայնքներից ընդհանուր ստացել է շուրջ 7,5 մլն դրամ։ Վերոնիկա Հակոբյանը Factor TV-ի հետ զրույցում ասաց՝ հրապարակմանը ծանոթ է, նաև պնդեց՝ տեսանյութում երևացող շան համարակալման թիվը համեմատել է իր բազայի տվյալների հետ, համընկնում չի եղել։ Այնուհանդերձ, Վերոնիկա Հակոբյանը չի բացառում, որ հղի շան ականջին կարող է տարբերանշան խփվել։

Այս ահազանգի ֆոնին Factor TV-ն ուսումնասիրել է, թե որ ընկերություններն են թափառող կենդանիների վնասազերծում իրականացնում և որքան գումար են ստանում այդ ծառայության համար։ Գնումների պետական համակարգի ուսումնասիրությամբ արձանագրեցինք, որ Հայաստանի տարբեր համայնքներում թափառող կենդանիների ստերջացմամբ զբաղվող հիմնական խաղացողներից են Գյումրիում գտնվող «Կումնի» և «Ադել շին» ընկերությունները։

«Կումնի» ընկերությունը հիմնադրվել է 2023 թվականին։ Ըստ իրավաբանական անձանց պետական ռեգիստրի՝ միակ սեփականատերը Հարություն Վիրաբյանն է։ Նա հիմնադրման տարում 10 մլն դրամ արժեքով պայմանագիր է կնքել Գյումրիի համայնքապետարանի հետ թափառող կենդանիների խնդիրը լուծելու համար։ Կարճ ժամանակ անց ընկերությունը քննադատությունների կենտրոնում հայտնվեց, հրապարակվեց տեսանյութ, ըստ որի՝ Գյումրիի շներին պահում են Ջաջուռում գտնվող անասնագոմում՝ դաժան պայմաններում։

2024 թվականին 4 մլն 455 հազար դրամ արժողությամբ պայմանագիր է կնքվել Արարատի համայնքապետարանի հետ, նույն թվականին ևս մեկ պայմանագիր՝ Սևանի համայնքապետարանի հետ՝ 2 մլն 370 հազար դրամ արժեքով։

2025 թվականին «Կումնի» ընկերությունն իր հիմնական գործառույթից դուրս մատակարարումներ է իրականացրել։ ԿԳՄՍՆ-ի ենթակայությամբ գործող «Կրթական ծրագրերի կենտրոնին» այն մատակարարել է ձուկ, բուսական ծագման յուղեր, ոչխարի ներքին օրգաններ, բամբակ, արյան ճնշման չափման սարք և այլ ապրանքներ։ Պայմանագրի արժեքը շուրջ կես մլն դրամ է։

«Ադել շին» ՍՊԸ-ն հիմնադրվել է 2022 թվականին, սեփականատերը Աիդա Ղազարյանն է։ Այս ընկերությունը թափառող շների խնդրի լուծման համար 2025 թվականին 3 մլն 652 հազար դրամի պայմանագիր է կնքել Արարատ համայնքի հետ,  Արթիկի համայնքապետարանի հետ՝ 2 մլն 520 հազար դրամի, Գավառի համայնքապետարանի հետ՝ 2 մլն 289 հազար դրամի, Ծաղկաձորի համայնքապետարանի հետ՝ 1 մլն 385 հազար դրամի, Աբովյանի համայնքապետարանի հետ՝ 2,5 մլն դրամի, Սևանի համայնքապետարանի հետ՝ 3 մլն 249 հազար դրամի, Սպիտակի համայնքապետարանի հետ՝ 1 մլն 80 հազար դրամի։

Տարբեր համայնքների հետ շների ստերջացման բազմամիլիոնանոց պայմանագրեր կնքած «Ադել շին» ՍՊԸ-ն այլ գործունեությամբ էլ է զբաղվում։ 2025 թվականի ընթացքում շուրջ կես մլն դրամի գրասենյակային կահույք է մատակարարել Մասիսի համայնքապետարանին։ 2024-ին էլ Թալինի համայնքապետարանին 750 հազար դրամի մետաղապլաստե դռներ է մատակարարել։

Ըստ Իրավաբանական անձանց պետական ռեգիստրի՝ «Ադել Շին» ՍՊԸ-ի հիմնադիր Աիդա Ղազարյանը և «Կումնի» ընկերության հիմնադիր Հարություն Վիրաբյանը միասին մեկ այլ իրավաբանական ընկերության՝ «Անկախ տաքսիստների ասոցիացիայի» անդամ են։ Սա, սակայն, այս երկու ընկերությունների միակ կապը չէ։ «Ադել Շին» ՍՊԸ-ի տնօրենը Գյումրիի նախկին քաղաքապետ Սամվել Բալասանյանի խորհրդական Սահակ Սահրադյանն է։ Նա նաև հիմնադրել է «Գյումրեցու ոգի» կուսակցությունը, որի ցուցակով 2016-ի ՏԻՄ ընտրություններում առաջադրվել էր նաև «Կումնի» ընկերության հիմնադիր Հարություն Վիրաբյանի որդին՝ Սեդրակ Վիրաբյանը։

Այս երկու ընկերությունն էլ այժմ սև ցուցակում են։ Ֆինանսների նախարարությունը «Կումնի» ընկերությանն արգելել է գնման մրցույթների մասնակցել Տաշիր համայնքի թափառող շների ստերջացումը պատշաճ չիրականացնելու համար, իսկ «Ադել շինը» սև ցուցակում է հայտնվել ԿԳՄՍՆ-ին կախիչների մատակարարումը պատշաճ չիրականացնելու համար։

Մանրամասները՝ տեսանյութում։

Նարեկ Կիրակոսյան