18.08.2026 | 20:13
Գալյանն ու ԱՄՆ գործերի ժամանակավոր հավատարմատարը քննարկել են բարեփոխումների օրակարգը
«Հանրապետություն» կուսակցությունում դեռ չեն որոշել՝ ընտրություններին դաշինքո՞վ կմասնակցեն, թե՞ միայնակ
Քաղաքականություն
23.01.2026 | 13:10
«Հանրապետություն» կուսակցությունը չի քննարկել՝ դաշինքո՞վ են մասնակցելու 2026-ի խորհրդարանական ընտրություններին, թե՞ միայնակ։
«Որոշում չկա այս պահին»,- Factor TV-ին հայտնեց կուսակցության անդամ Հայկ Սահակյանը։ Թեև դաշինքով մասնակցության հարց չեն քննարկել, կուսակցականն ասաց, թե որ ուժերի հետ են բացառում համագործակցությունը։
«Դաշնակցության, քոչարյանամերձ կուսակցությունների հետ բացառում ենք դաշինք կազմելը»,- ասաց Հայկ Սահակյանը։
Հիշեցնենք, որ «Հանրապետություն» կուսակցությունը երեկ հայտարարեց հունիսի 7-ին կայանալիք խորհրդարանական ընտրություններին մասնակցության մասին։ Նախընտրական շտաբը կղեկավարի կուսակցության անդամ, Դավթաշեն վարչական շրջանի ղեկավար Ալբերտ Հովասափյանը։
Նշենք, որ հունիսի 7-ին կայանալիք ընտրություններին մասնակցության մասին արդեն հայտարարել են իշխող «Քաղաքացիական պայմանագիր» կուսակցությունը, «Հայ ազգային կոնգրես»-ը, «Հայ Յեղափոխական Դաշնակցություն»-ը, «Լուսավոր Հայաստան» կուսակցությունը, ՀՀ երկրորդ նախագահ Ռոբերտ Քոչարյանը, ՀՀ նախկին ՄԻՊ Արման Թաթոյանը, Կարապետյանների «Մեր ձևով» շարժումը՝ «Ուժեղ Հայաստան» կուսակցությամբ, Երևանի նախկին քաղաքապետ Հայկ Մարությանը՝ «Նոր ուժ» կուսակցությամբ, «Նժար» սահմանադրական շարժումը, «Դեմոկրատիա, օրենք, կարգապահություն» կուսակցությունը։ «Հայաստանի Հանրապետական կուսակցություն»-ն էլ դեռ քննարկում է մասնակցության հարցը։
Արփի Հակոբյան
