29.10.2026 | 16:10
Արամ Վարդևանյանի ճեպազրույցը` ՈւՂԻՂ
Այսօրվանից ԱՄՆ-ն դադարեցնում է ներգաղթային վիզաների տրամադրումը․ ՏԵՍԱՆՅՈՒԹ
Հասարակություն
21.01.2026 | 13:30
Այսօրվանից ԱՄՆ-ն անորոշ ժամկետով դադարեցնում է ներգաղթային վիզաների տրամադրումը Հայաստանի և ավելի քան 70 երկրի քաղաքացիների համար։ Պետքարտուղարությունը հայտնել է, որ վերանայելու է ներգաղթային վիզաների տրամադրման քաղաքականությունը՝ ապահովելու համար, որ «բարձր ռիսկայնության երկրների» ներգաղթյալները չօգտվեն Միացյալ Նահանգների սոցիալական ապահովության համակարգից։
Հայաստանից բացի՝ ԱՄՆ ներգաղթի վիզաների տրամադրումը դադարեցվում է նաև տարածաշրջանի մյուս երկրների՝ Իրանի, Թուրքիայի, Ադրբեջանի, Վրաստանի, ինչպես նաև Ռուսաստանի ու Բելառուսի քաղաքացիների համար։
Միաժամանակ, ներգաղթային վիզայի դիմորդները կարող են ներկայացնել վիզայի դիմումներ և մասնակցել հարցազրույցների։ Պետքարտուղարությունը հայտնում է, որ կշարունակեն դիմորդների համար հանդիպման օրեր նշանակել, բայց այս շրջանում ներգաղթային վիզաներ չեն տրամադրվի։
Ներգաղթի վիզաների տրամադրման դադարեցումը չի վերաբերում երկքաղաքացիություն ունեցող այն անձանց, որոնք դիմում են ԱՄՆ սահմանափակումներում չընդգրկված երկրի վավեր անձնագրով։ Այն չի տարածվում նաև այն քաղաքացիների վրա, որոնք, որպես միգրանտ, արդեն ունեն ներգաղթային վիզա։
Հունվարի 21-ից ուժի մեջ մտնող սառեցումը չի տարածվի ոչ ներգաղթային վիզաների, տուրիստական, ուսումնական կամ գործարար վիզաների դիմորդների վրա։
Միջազգային լրատվամիջոցները կանխատեսում են, որ ներգաղթային վիզաների դադարեցման որոշումից հետո ԱՄՆ-ի ոչ ներգաղթային վիզաների պահանջարկն առաջիկա ամիսներին կտրուկ աճելու է։
Ավելի վաղ հայտնել էինք, որ ԱՄՆ-ը կասեցրել է շուրջ 30 տարի գործող ներգաղթի վիճակախաղի (Գրին քարտ) ծրագիրը։
Անի Թամրազյան
