14.04.2026 | 23:28
Կրեմլը վերանայում է ինտերնետի սահմանափակումների նկատմամբ մոտեցումը՝ վախենալով Պուտինի վարկանիշի անկումից․ Bloomberg
«Գրին քարտ»-ով ԱՄՆ չեք կարող գնալ․ Թրամփը կասեցրել է ծրագիրը, այլընտրանքը 1 մլն դոլար արժե․ ՏԵՍԱՆՅՈՒԹ
Հասարակություն
22.12.2025 | 18:45
«Գրին քարտ» ստանալ երազողները ստիպված են սպասել․ ԱՄՆ-ն կասեցրել է շուրջ 30 տարի գործող ներգաղթի վիճակախաղի ծրագիրը։ Այս որոշումը հաջորդել է Բրաունի համալսարանում հնչած կրակոցներին․ ԱՄՆ իրավապահները պարզել են, որ կասկածյալը երկրում հաստատվել է հենց այդ ծրագրով։
Ինչ հնարավորություններ է տալիս ծրագիրը
-Ապրել ԱՄՆ-ում որպես մշտական բնակիչ՝ առանց վիզայի կամ այլ կարճաժամկետ թույլտվությունների անհրաժեշտության։
-Աշխատել ազատորեն՝ առանց գործատուի կողմից հատուկ թույլտվություն ստանալու։
-Ներգաղթել ընտանիքի անդամների հետ՝ ընտանիքի անդամների համար ընտանեկան վիզաների միջոցով։
-ԱՄՆ-ում բավարար ժամանակ բնակվելով և որոշակի պայմանների համապատասխանելով՝ դիմել ԱՄՆ քաղաքացիություն ստանալու համար։
-Հաշվառվել ԱՄՆ-ում պետական կամ մասնավոր ծառայությունների համար՝ ինչպիսիք են առողջապահությունը, կրթությունը, սոցիալական ապահովությունը և այլն։
Երբվանից է գործում ծրագիրը
1990-ականներին մեկնարկած ծրագիրը տարեկան 50,000 վիզա էր տրամադրում այն երկրների քաղաքացիներին, որտեղից ԱՄՆ ներգաղթի տեմպերը համեմատաբար ցածր են։ Թեկնածուները պատահականորեն ընտրվում էին վիճակախաղի միջոցով: Ամեն տարի տասնյակ միլիոնավոր մարդիկ էին դիմում՝ ամերիկյան երազանքին հասնելու համար։
ԱՄՆ Պետքարտուղարության կայքից տեղեկանում ենք, որ 2025 թվականի վիզայի վիճակախաղին դիմել է գրեթե 20 միլիոն մարդ, որոնցից ավելի քան 131,000-ն ընտրվել է։ Հաղթելուց հետո սովորաբար նրանք անցնում են ստուգում՝ Միացյալ Նահանգներ մուտք գործելու համար։
Քանի մարդ է դիմել ՀՀ-ից և տարածաշրջանից
ՀՀ քաղաքացիներն ակտիվորեն մասնակցում են «Գրին քարտ»-ի խաղարկությանը։ DV-2025 ծրագրի շրջանակում Հայաստանից դիմել է 2,971 անձ։ Տարածաշրջանում ամենաբարձր թիվը գրանցվել է Իրանից՝ 5,267 հաստատված դիմորդ։ Թուրքիայից դիմել է 4,194 անձ, Ադրբեջանից՝ 1,730, իսկ Վրաստանից՝ 1,342։ Ընդունվել է Ռուսաստանից դիմած 5,519 անձի դիմում, Ուկրաինայից՝ 4,002։
Աֆղանստանից «Գրին քարտ»-ի վիճակահանությանը դիմել է 4,009 անձ։ Սակայն մոտ մեկ ամիս առաջ ԱՄՆ-ը անորոշ ժամանակով դադարեցրել է Աֆղանստանի քաղաքացիներին վերաբերող բոլոր միգրացիոն հարցումների քննումը։ Պատճառը Սպիտակ տան մոտ հնչած կրակոցներն էին, որոնց հետևանքով վիրավորվել էր Ազգային գվարդիայի երկու զինվոր: Իրավապահները կալանավորել էին Վաշինգտոն նահանգում բնակվող 29-ամյա աֆղանցու։
ԱՄՆ կառավարությունը «Գրին քարտ» ծրագրի ընթացքը կասեցրել է՝ մինչև լրացուցիչ որոշումների կամ օրենսդրական փոփոխությունների իրականացումը։ Ներքին անվտանգության նախարարությունը հայտարարել է, որ որոշումը ժամանակավոր կասեցում է, և ծրագիրը դեռ ամբողջությամբ չի չեղարկվել։
Ուշագրավ է, որ զուգահեռաբար Թրամփը չորեքշաբթի պաշտոնապես գործարկեց իր «Ոսկե քարտ» վիզան, որը ներգաղթի նոր ուղի է և թույլ կտա օտարերկրացիներին վճարել 1 միլիոն դոլար՝ իրենց վիզայի դիմումը արագացնելու համար, կամ ընկերություններին վճարել 2 միլիոն դոլար՝ ԱՄՆ բերելու համար այն օտարերկրյա աշխատակցին, ում ցանկանում են հովանավորել։
Մանրամասները՝ տեսանյութում։
Անի Թամրազյան
