29.06.2026 | 12:03
Նորագյուղում գույքի փոխհատուցման չափը փոխվել է․ սեփականատերն իրավունք ունի ինքն ընտրել գնահատողին․ ՏԵՍԱՆՅՈՒԹ
Ասաց՝ ուրախ է, որ Հայաստանում է․ Ավանեսյանն այցելել է ադրբեջանական գերությունից վերադարձած Վագիֆ Խաչատրյանին
14.01.2026 | 22:29
Ադրբեջանական գերությունից այսօր Հայաստան վերադարձված Վագիֆ Խաչատրյանն այժմ հետազոտվում է «Նորք-Մարաշ» ԲԿ-ում։ Այս մասին լրագրողներին հայտնել է Խաչատրյանին այցելած առողջապահության նախարար Անահիտ Ավանեսյանը։
«Տեսակցեցի Վագիֆին, ասաց, որ լավ է, ուրախ է, քանի որ Հայաստանում է, սպասում է հարազատների հետ հանդիպմանը։ Նա այս պահին հետազոտվում է։ Գիտենք, որ Վագիֆը ուներ նաև սրտային քրոնիկ վիճակ, և մենք պետք է որոշակի հավելյալ հետազոտություններ իրականացնենք։ Մեր մասնագիտական թիմը որոշումներ կկայացնի հետագա բուժման ընթացքի վերաբերյալ՝ վստահ լինելով, որ լավագույն հսկողության տակ է»,- ասաց նախարարը։
Ավանեսյանի խոսքով՝ Ադրբեջանից Հայաստան վերադարձած Վագիֆ Խաչատրյանի առողջական վիճակը լավ է, մյուս երեք քաղաքացիների առողջական վիճակը բավարար է գնահատվում։
Նշենք, որ ավելի վաղ Վագիֆ Խաչատրյանի ընտանիքի հարազատներից մեկը մեզ հետ զրույցում ասել էր, որ անակնկալի են եկել՝ իմանալով Խաչատրյանի՝ հայրենիք վերադառնալու լուրը։ Սկզբում զանգով են տեղեկացել, ապա Նիկոլ Փաշինյանի գրառումն են կարդացել։
Հիշեցնենք, որ Ադրբեջանն այսօր Հայաստանին է փոխանցել 4 հայ գերիների՝ Դավիթ Դավթյանին, Գևորգ Սուջյանին, Վիգեն Էուլջեքջյանին, Վագիֆ Խաչատրյանին: Այս լուրն առաջինը Ֆեյսբուքում հայտնեց վարչապետ Փաշինյանը, որին հաջորդեց ԱԱԾ պաշտոնական հաղորդագրությունը։ Այս տեղեկությանը զուգահեռ Արդարադատության նախարարությունը հայտնեց, որ ցմահ ազատազրկման դատապարտված Սիրիայի Արաբական Հանրապետության քաղաքացիներ Յուսեֆ Ալաաբեթ ալ-Հաջին և Մուհհռաբ Մուհամմադ ալ-Շխերին Թուրքիայի միջոցով այսօր փոխանցվել են Սիրիայի իրավասու մարմիններին: Նրանք մեղադրվում են միջազգային ահաբեկչության, զինված ընդհարումների ժամանակ միջազգային մարդասիրական իրավունքի նորմերի լուրջ խախտումների, վարձկանության հոդվածներով:
Արփի Հակոբյան
