Հեռուստատեսության և ռադիոյի հանձնաժողովը հունվարի 12-ին գումարել է տարվա առաջին նիստը։ Օրակարգում ընգրկված վեց հարցերից, չորսը վերաբերել է 4 ռադիոընկերությունների կողմից հիշատակի օրը գովազդի հեռարձակման արգելքը խախտելուն։ Այս մասին տեղեկացնում է ՀՌՀ-ը։
««ՔԻՍՍ ԷՖ ԷՄ» ՍՊԸ-ի «ՔԻՍՍ ԷՖԷՄ» լսողական ծրագրով, «ԷՅ ԴԻ ԹԻ» ՍՊԸ-ի «ՓՈՓ ԷՖԷՄ» լսողական ծրագրով, «ՇԱՆՍ ՄԵԴԻԱ» ՍՊԸ-ի «ՌԱԴԻՈ ՇԱՆՍՈՆ» լսողական ծրագրով, ինչպես նաև ՄԵՐԻ ՄԿՐՏՉՅԱՆ ՀՐԱՉՅԱՅԻ ԱՁ-ի «ՌԱԴԻՈ ՎԱՆ ԳՅՈՒՄՐԻ» լսողական ծրագրով արձանագրվել է Օրենքի 9-րդ հոդվածի 4-րդ մասի դրույթի պահանջի առերևույթ խախտում (պետության հայտարարած սգո և հիշատակի օրերին գովազդի և զվարճալի հաղորդումների հեռարձակումը Հեռարձակողների կողմից արգելվում է)» ,- ասված է հաղորդագրության մեջ։
Հանձնաժողովի մշտադիտարկման ընթացքում պարզվել է, որ այդ ընկերությունները երկրաշարժի զոհերի հիշատակի և աղետներին դիմակայունության օրը՝ դեկտեմբերի 7-ին, հեռարձակել են գովազդներ։ ՀՌՀ-ն չորս ընկերությունների նկատմամբ կիրառել է Օրենքի 57-րդ հոդվածի 22-րդ մասով սահմանված վարչական տույժը՝ յուրաքանչյուրին տուգանելով 400․000-ական ՀՀ դրամի չափով:
Օրակարգում ընդգրկված մյուս երկու հարցերը վերաբերել են «ՄԱՐՏՈՒՆԻ ՏՎ» ՍՊ ընկերության ցանցային օպերատորի գործունեության ԿՀ N 349 լիցենզիայի գործողությունը դադարեցնելու դիմումին և «ԼՈՌՈՒ ՄԻԳ» ՍՊ ընկերության նկատմամբ վարչական ակտի ընդունմանը (սեփական նախաձեռնությամբ հարուցված թիվ 67 վարչական վարույթի եզրափակիչ փուլ):
Հաղորդվում է, որ Հեռուստատեսության և ռադիոյի հանձնաժողովը որոշել է բավարարել «ՄԱՐՏՈՒՆԻ ՏՎ» ՍՊԸ-ի դիմումը և ուժը կորցրած ճանաչել 2022թ․ դեկտեմբերի 28-ին Ընկերությանը տրամադրած ցանցային օպերատորի գործունեության ԿՀ N 349 լիցենզիան:
«Իսկ «ԼՈՌՈՒ ՄԻԳ» ընկերությանը պատկանող «ՄԻԳ ՌԱԴԻՈ» լսողական ծրագրով 2025թ․ նոյեմբերի 13-ին և 14-ին հեռարձակվել են բժշկական օգնություն և սպասարկում իրականացնող կազմակերպությունների կամ անհատ ձեռնարկատերերի գովազդներ, որոնցում չեն նշվել կազմակերպությունների կամ անհատ ձեռնարկատերերի գործունեության լիցենզիայի համարը և տրամադրման ամսաթիվը)»։
Հանձնաժողովը ընկերությանը տուգանել է 500․000 ՀՀ դրամի չափով («Տեսալսողական մեդիայի մասին» oրենքի 57-րդ հոդվածի 16-րդ մասով սահմանված վարչական տույժ):
Նշվում է, որ այս որոշումներն ուժի մեջ մտնելու պահից երկամսյա ժամկետում կարող են բողոքարկվել Հեռուստատեսության և ռադիոյի հանձնաժողովին կամ ՀՀ վարչական դատարան։
