Ադրբեջանը պաշտոնական դիմում է ուղարկել FIS-ին՝ հայ դահուկորդ Միքայել Միքայելյանի հետ կապված

Ադրբեջանի պետական ​​զբոսաշրջության գործակալությունը հայտարարություն է արել այն մասին, որ պաշտոնապես դիմել է FIS-ին՝ «արտահայտելով իր դժգոհությունը և ընդգծելով համագործակցության շրջանակներում վերահսկողության միջոցառումները ուժեղացնելու անհրաժեշտությունը» հայ դահուկորդի գործողություններին գնահատական տալու պահանջով։

«Նման միջադեպերի դեմ ձեռնարկվող բոլոր քայլերն ու միջոցառումները կարգավորվում են Դահուկավազքի և սնոուբորդի միջազգային ֆեդերացիայի ներքին կանոններով և ընթացակարգերով, և կախված նման միջադեպերի կրկնությունից՝ FIS-ը կիրառում է համապատասխան պատժամիջոցներ և տուգանքներ: Մենք կարծում ենք, որ մրցումներին մասնակցող մարզիկները պետք է հետևեն ֆեդերացիայի ընդհանուր մարզական և էթիկական սկզբունքներին: Սպորտի ապաքաղաքականացումը և էթնիկ ատելության, ռասիզմի, քսենոֆոբիայի և այլ բացասական դրսևորումների խուսափումը պետք է լինեն հիմնարար պահանջ բոլոր մարզիկների և մրցաշարերի համար», – ասվում է հայտարարության մեջ:

Անցյալ տարվանից FIS-ը և Ադրբեջանի պետական ​​զբոսաշրջության գործակալությունը համագործակցում են ձմեռային զբոսաշրջության ոլորտում, ինչպես նաև՝ Ադրբեջանում ձմեռային սպորտաձևերի հեղինակավոր միջազգային մրցումներ անցկացնելու նպատակով:

Հիշեցնենք՝ հայ դահուկորդ Միքայել Միքայելյանը Իտալիայում կայացած  Tour de Ski մրցաշարի ժամանակ իր համազգեստի վրա «Ադրբեջան» բառը փակելու համար ավելի վաղ  տուգանվել էր:

Թարգմանությունը՝ Էմմա Չոբանյանի