22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
ՀՀ ԱԱԾ-ն ФСБ-ի կցո՞րդ, թե՞ անկախ մարմին. «սատանա բռնելուց» մինչև պատարագի տեքստին միջամտելու փորձ․ ՏԵՍԱՆՅՈւԹ
Քաղաքականություն
08.01.2026 | 21:20
ԱԱԾ աշխատակցի օրն է, և այս առիթով Փաշինյանն այցելել է հատուկ ծառայություն։ Վարչապետն առանձնահատուկ շեշտել է՝ ԱԱԾ-ից որևէ դժգոհություն չունի։
«ԱԱԾ-ի նկատմամբ չունեմ որևէ վերապահում։ Չի եղել իրավիճակ, որտեղ որպես ծառայություն պետք է գործեր այսպես, բայց գործել է այնպես»,- հայտարարել է Փաշինյանը։
ԱԱԾ-ն վարչապետի ենթակա կառույց է 2018 թվականից, երբ Հայաստանն անցում կատարեց խորհրդարանական կառավարման մոդելի։ Հայաստանի անվտանգությանը սպառնացող վտանգները չեզոքացնելու լիազորություն ունեցող ԱԱԾ-ում, պարզվում է, չեն խորշում երբեմն Նիկոլ Փաշինյանի անձնական ցանկությունները կատարելուց։ Օրինակ՝ Կաթողիկոսի դեմ արշավի շրջանակում քահանաներին հորդորել պատարագների ընթացքում չհնչեցնել Ամենայն Հայոց Գարեգին Բ կաթողիկոսի անունը։
Փաշինյանը, որը հետհեղափոխական ԱԱԾ-ին հանձնարարում էր Հայաստանում բռնել սատանաներին, ՀԴՄ կտրոն չտվող տնտեսվարողներին վերահսկել, ռեյդեր իրականացնել, այսօր հայտարարեց, թե ԱԱԾ-ն պետք է ինտելեկտուալ կառույց լինի, արագ արձագանքի հիբրիդային պատերազմին ու թմրանյութերի շրջանառությանը։
«ԱԱԾ-ն ուժային կառույց պետք է լինի վերջին հերթին, ուժի գործադրման պահը պետք է հասնի այն ժամանակ, երբ դրա ծայրահեղ անհրաժեշտությունը կա»,- ասաց նա։
ԱԱԾ աշխատակցի տոնը հունվարի 8-ին է նշվում 2024 թվականից։ Մինչ այդ, անկախ Հայաստանի ԱԱԾ-ականները դեկտեմբերի 20-ն էին տոնում՝ խորհրդային ԿԳԲ-ի Չեկիստի օրը։
Անկախ Հայաստանի ԱԱԾ-ն բովանդակային փոփոխության ենթարկվե՞լ է, թե՞ միայն տոնական օրն է փոխվել․ այս հարցի պատասխանի փնտրտուքով ԱԱԾ պաշտոնական կայքում հանդիպեցինք այս ուշագրավ ձևակերպմանը․ «1991թ. դեկտեմբերի 4-ին ընդունված «Հայաստանի Հանրապետության կառավարության կազմի և կառուցվածքի մասին» ՀՀ օրենքով ՊԱԿ-ը վերանվանվեց Ազգային անվտանգության պետական վարչություն»։
ԱԱԾ պաշտոնական կայքում դեռ հասանելի են հայտարարություններ, որոնցով հատուկ ծառայությունը հայ երիտասարդներին հրավիրում է ուսման ռուսական ФСБ-ի (ԱԴԾ) ակադեմիայում։
Իրավապաշտպան Վարդան Հարությունյանը նշում է՝ փոխվել է միայն ծառայության անունը, սակայն էությունը մնացել է նույնը, ինչ խորհրդային տարիներին էր. «Չի կտրել կամ չի կարողացել կտրել ռուսական ՖՍԲ-ից, շարունակել է մնալ այդ կառույցի մասնաճյուղ։ Մինչ հիմա էլ մեր ԱԱԾ-ականները իրենց ուսումը ստանում են ռուսական կառույցներում»։
ԱԺ «Հայաստան» խմբակցության պատգամավոր Գեղամ Մանուկյանը կարծում է՝ ԱԱԾ-ն Փաշինյանի ձեռքին գործիք է դարձել ընդդիմադիրներին ճնշելու համար։
Գարեգին Բ-ի եղբոր՝ Եզրաս արքեպիսկոպոս Ներսիսյանի՝ ԿԳԲ գործակալ լինելու մասին հրապարակումից հետո Գեղամ Մանուկյանը դիմել է ԱԱԾ-ին և այլ ենթադրյալ գործակալների անուններ խնդրել։ Կառույցից մերժում ստացած Գեղամ Մանուկյանը, այդուհանդերձ, դեմ է լյուստրացիային։
Ոչ միայն ԱԱԾ-ում, այլ նաև մյուս ուժային կառույցներում լյուստրացիա իրականացնելու պահանջ արդեն տարիներ շարունակ ներկայացնում են քաղհասարակության ներկայացուցիչները։
ՔՊ-ական պատգամավոր Լուսինե Բադալյանը նույնպես ուզում է իմանալ՝ ինչու լյուստրացիա տեղի չունեցավ։
Այդուհանդերձ, Փաշինյանի թիմակիցը կարծում է, որ ԱԱԾ-ն պետականությանն ուղղված մեծ աշխատանք է կատարում։
«ՀՀ-ն պատերազմում պարտությունից հետո, երբ թիրախավորվել էր, շարունակվող հիբրիդային պատերազմի պայմաններում, երբ ՀՀ-ն կարողացավ ճիշտ դիրքավորվել, այս առումով ԱԱԾ-ի դերը քիչ չի եղել»,- նշել է Փաշինյանը։
Փաշինյանի իշխանության ութ տարիների ընթացքում ԱԱԾ-ում հասարակության համար ամենաակնառուն, թերևս, ծառայության տնօրենի փոփոխությունն է։ Փաշինյանն այս ժամանակահատվածում հասցրել է վեց տնօրեն նշանակել ու ազատել պաշտոնից։
Մանրամասները՝ տեսանյութում։
Նարեկ Կիրակոսյան
