Պառակտումը վաղուց է տեղի ունեցել․ Փաշինյանը՝ եկեղեցու մասին. ՏԵՍԱՆՅՈՒԹ

«Պառակտումը վաղուց է տեղի ունեցել, որովհետև Հայաստանի ժողովուրդը, ըստ էության, հեռացված է եկեղեցուց, և Հայաստանի ժողովուրդը ավելի ու ավելի պակաս կապ ունի իր եկեղեցու հետ, որովհետև եկեղեցու վերնախավի գործելակերպը հենց ժողովրդին, եկեղեցին մեկուսացնելն է ժողովրդից»,- այս մասին լրագրողների հետ ճեպազրույցի ժամանակ ասաց վարչապետ Նիկոլ Փաշինյանը՝ եկեղեցու հետ կապված իր գործողությունների մասին խոսելիս։

Նրա խոսքով՝ ընթացող պրոցեսները մարդկանց ավելի շատ են տանում պատարագների, նույնիսկ ընդդիմադիր գործիչները խորան են բարձրանում, պատարագի են մասնակցում, սարկավագ են դառնում։

«Մեր խնդիրն է վերականգնել ժողովրդի և եկեղեցու միասնությունը։ Ինչ վերաբերում է Սուրբ Ծննդյան ուխտերթին, ես կարծում եմ, որ այն բավական մարդաշատ էր, այնտեղ կային պետական պաշտոնյաներ, այնտեղ կային քաղաքացիներ, այնտեղ կային․․․ ինձ քանի հոգի զոհվածի մայրեր են մոտեցել այդ երթի ժամանակ, իրենք պետական պաշտոնյա չէին։ Մարզերի բնակիչներ են մոտեցել, մարդիկ կային, արտերկրից էին եկել, որ այդ երթին մասնակցեն, իրենք պետական պաշտոնյա չէին։ Այդպես որ նայենք, ես մասնակցել եմ, պետական պաշտոնյա եմ։ Օրինակ, կառավարության անդամներ եղե՞լ են, որ մասնակցել են, եղել են։ Վարչապետը հրավիրում է երթ, և պետական կառավարման թիմակիցները պիտի չմասնակցե՞ն, հա՞, պիտի բոյկոտե՞ն։ Բա չմասնակցեին, պիտի ասեիք՝ վարչապետը երթ է հրավիրել, հլը նայեք, պաշտոնյաները մի հատ էլ բան են արել, բոյկոտել են, սա նշանակում է կառավարման ճգնաժամ կա Հայաստանի Հանրապետությունում։

Պաշտոնյաներն էլ են մասնակցել, ոչ պաշտոնյաներն էլ, որովհետև կառավարության ղեկավարը մասնակցում է, այդ փաստի բերումով, այսինքն՝ իմ կոչն է եղել, ես եմ հրավիրել։ Չեմ ասել՝ պաշտոնյաները չգան, ոչ պաշտոնյաները գան»,- նշեց նա։

Մանրամասները՝ տեսանյութում։