28.04.2026 | 12:12
Հրապարակվել են ԱԺ ընտրությունների ընտրացուցակները
Փաշինյանի եղբորը տնօրեն նշանակած գործարարը կառավարությունից արտոնություն կստանա
Քաղաքականություն
07.01.2026 | 19:11
Վարդերի բիզնեսով զբաղվող «Ռոզելին Բայ Կօկ» ընկերությունը կազատվի 81,5 մլն դրամի մաքսատուրք վճարելուց։ Համապատասխան նախագիծը ներկայացված է կառավարության վաղվա նիստի օրակարգում։ Ոչ ԵՏՄ անդամ պետություններից վարդերի աճեցման համար ներկրվելու են 1, 6 մլրդ դրամի սարքավորումներ։
Factor.am-ը պարզեց, որ կառավարությունը 81,5 մլն դրամի արտոնություն է տալիս շուրջ կես տարի առաջ հիմնադրված ընկերությանը։ Իրավաբանական անձանց պետական ռեգիստրի տվյալների համաձայն՝ «Ռոզելին Բայ Կօկ» ընկերությունը պետական գրանցում է ստացել 2025 թվականի հունիսի 17-ին։ Ընկերության տնօրենն ու միակ սեփականատերը Յուրի Քոքոբելյանն է։ Նա «Ազատ դեմոկրատներ» կուսակցության նախագահ Խաչատուր Քոքոբելյանի եղբորորդին է։
Factor.am-ը իրավաբանական անձանց պետական ռեգիստրից տեղեկանում է, որ Նիկոլ Փաշինյանի եղբայրը՝ Արմեն Փաշինյանը, Յուրի Քոքոբելյանին պատկանող այլ՝ «Արգիշտի-2» և «Միթ Արգո» ընկերությունների տնօրենն է, ինչպես նաև՝ Յուրի Քոքոբելյանի հոր՝ Վաչիկ Քոքոբելյանին պատկանող «Մինա-Մայա» ընկերության տնօրենը։
Նշենք, որ 2024 թվականի ամռանը իրավապահները հետախուզում էին հայտարարել Յուրի Քոքոբելյանի նկատմամբ։ Ըստ լրատվամիջոցների` նա մեքենա էր վարել առանց վարորդական իրավունքի վկայականի։
Նարեկ Կիրակոսյան
