30.10.2026 | 14:46
Հայտնի է՝ երբ է բացվելու «Միլանի» և «Ինտերի» նոր ստադիոնը
10 ամենաթանկ պետական գնումները 2025-ին
07.01.2026 | 19:30
2025 թվականին պետական ամենաթանկ 10 գնումների համար ծախսվել է 47 մլրդ 167 մլն դրամ։ Factor.am-ն ուսումնասիրել է պետական գնումների էլեկտրոնային Armeps համակարգն ու պարզել, որ 10 գնումից 4-ն իրականացվել է առանց մրցույթի՝ մեկ անձ ընթացակարգով, իսկ դրանցից մեկը՝ հրատապ կարգով։
Ամենաթանկ գնումն անցած տարում իրականացրել է «Երևանի ավտոբուս» ՓԲԸ-ն․ Երևան համայնքին պատկանող ընկերությունը 8 մլրդ 471 մլն դրամով «Արպանիվ» ՍՊԸ-ից 772 հատ անվադողեր է գնել Zhong Tong ավտոբուսների համար։
Երկրորդ տեղում Հանրային հեռարձակողի խորհրդի մեկ անձից կատարված գնումն է՝ 6 մլրդ 569 մլն դրամ արժեքով։ Այդքան գումար 2025-ի տարեսկզբին ՀՀԽ-ն վճարել է «Հայաստանի հանրային հեռուստաընկերություն» ՓԲԸ-ին՝ հեռուստատեսային արտադրանքի հետ կապված ծառայությունների համար։
Երրորդ տեղում Պետգույքի կառավարման կոմիտեի գործարքն է՝ 5 մլրդ 775 մլն դրամ։ Կոմիտեն «Մերիդիան Հոլդինգ» ՓԲԸ-ից ծառայություններ է ձեռք բերել։ Խոսքը 2026-ին Հայաստանում կայանալիք ՄԱԿ Կենսաբանական բազմազանության մասին կոնվենցիայի կողմերի 17-րդ համաժողովի (COP 17) ընթացքում «Մերիդիան» էքսպո կենտրոնում միջոցառումների անցկացման մասին է։ Գնումն իրականացվել է մեկ անձ ընթացակարգով։
2025-ի հաջորդ խոշոր գնումը կատարել է Երևանի քաղաքապետարանը՝ 4 մլրդ 750 մլն դրամով «Զովեր Քնսթրաքշն» ՍՊԸ-ին պատվիրելով Ալբերտ Ազարյանի անվան մարզադպրոցի նոր մարզաբազայի կառուցման կապալային աշխատանքներ։ Գնումը քաղաքապետարանը համարել է հրատապ և իրականացրել առանց մրցույթի։ Այս ընկերության ղեկավարն ու փոխկապակցված մի քանի անձինք, հիշեցնենք, 2023-ին «Քաղաքացիական պայմանագիր» կուսակցությանը խոշոր նվիրատվություններ էին արել։
Հաջորդը կրկին Երևանի քաղաքապետարանն է․ 4 մլրդ 326 մլն դրամով «YUTONG BUS CO.» LTD-ից գնել է 45 տրոլեյբուս։
ՏԿԵՆ-ը 3 մլրդ 680 մլն դրամով «Եվրոասֆալտ» ՓԲԸ-ից գնել է ճանապարհների վերանորոգման աշխատանքներ։ Ընկերությունը հիմնանորոգել է Հ-70, Մ-6-Աթան հանրապետական նշանակության ավտոճանապարհի 27․5 կմ-անոց հատվածը։ Նկատենք, որ աշխատանքները սկսվել են դեռ 2023-ին, պետք է ավարտվեին 1 տարում, սակայն նախարարությունը միայն 2025-ի հուլիսին է ընդունել դրանք։
Հաջորդը Հայաստանի տարածքային զարգացման հիմնադրամն է՝ 3 մլրդ 579 մլն դրամ գնումով։ «Եվրոպա» ՍՊԸ-ն կառուցել է Գեղարքունիքի Արեգունի, Կախակն և Փոքր Մասրիկ բնակավայրերի կրթահամալիրները։
ՏԿԵՆ-ը 3 մլրդ 375 մլն դրամ է վճարել «Ա.Ա.Բ. պրոեկտ» ՍՊԸ-ին՝ Տաթև-Աղվանի (Մ-2) միջպետական նշանակության ավտոճանապարհի 19․5 կմ-անոց հատվածի հիմնանորոգման համար։ Պայմանագիրը կնքվել էր 2024-ի օգոստոսին, աշխատանքն ավարտվել է 2025-ի նոյեմբերին։
9-րդ տեղում Բարձրագույն կրթության և գիտության կոմիտեն է՝ 3 մլրդ 328 մլն դրամով։ Այս գնումը հատկապես ուշագրավ է, քանզի կատարվել է ՀՀ կառավարության հատուկ թույլտվությամբ, մեկ անձից, իսկ գնման առարկան միայն խորհրդատվական ծառայություն է։ Լոնդոնի Համալսարանական Քոլեջին պատկանող «ՅուՍիԷլ Քընսալթանթս Լիմիթիդ» ընկերությունը պետք է մինչև 2030 թվականն աջակցի Ակադեմիական քաղաքի ծրագրի կրթական կլաստերի մշակմանը։
Ամենաթանկ պետական գնումների թոփ տասնյակը եզրափակում է Երևանի քաղաքապետարանը, որը 3 մլրդ 311 մլն դրամով «Ռաֆէլգրիգ» ՓԲԸ-ից գնել է 104 վերելակ և դրանց տեղադրման ծառայություն։
Անցած տարում թանկարժեք գնում ձեռք է բերել նաև ՀՀ պաշտպանության նախարարությունը՝ 3 մլրդ 284 մլն դրամով վճարելով «Արդշինբանկ» ՓԲԸ-ին՝ ծառայությունների դիմաց։ Թե կոնկրետ ի՞նչ գործարք է և ի՞նչ ծառայություններ է մատուցել բանկը, հայտնի չէ․ Armeps-ում որևէ փաստաթուղթ չի հրապարակվել։
Ուշագրավ է նաև մեկ այլ գործարք․ Երևանի քաղաքապետարանը 2025-ի դեկտեմբերի 15-ին 3 մլրդ 28 մլն դրամ դոտացիա է ստացել ՏԿԵՆ-ից՝ Երևանի քաղաքապետի սեփական լիազորություների իրականացմանն աջակցելու նպատակով։
Գայանե Խաչատրյան
