Եկեղեցական արարողության խոչընդոտումը քրեական հանցագործություն է. Արագածոտնի թեմի հայտարարությունը

Արագածոտնի թեմը հայտարարություն է տարածել Թալինի Սուրբ Աստվածածին եկեղեցում դեկտեմբերի 31-ին տեղի ունեցած միջադեպի կապակցությամբ՝ մտահոգություն հայտնելով եկեղեցական կարգի խախտման և համայնքապետի հակականոնական պահանջների վերաբերյալ։Արագածոտնի թեմը հայտնում է, որ դեկտեմբերի 31-ին Թալինի Սուրբ Աստվածածին եկեղեցում հոգևորականների կողմից կատարվելիք «Նռնօրհնեքի» կարգը խոչընդոտվել է Թալինի համայնքապետ Տավրոս Սափեյանի և տեղի կարգալույծ եղած նախկին հոգևորական Արամայիս Թախմազյանի կողմից։

«Համայնքապետի հետ զրույցից հետո հոգևորականները և հավատավոր ողջ ժողովուրդը, անախորժություններից և բախումներից խուսափելու համար, դուրս են եկել եկեղեցուց։ Դրանից հետո եկեղեցում համայնքապետի և կարգալույծ անձի ներկայությամբ «արարողություն» է կատարվել։ Նրանց կողմից եկեղեցին լքելուց հետո միայն թեմի հոգևորականները հավատացյալ ժողովրդի հետ միասին ամանորյա աղոթք են արել և «Նռնօրհնեքի» կարգ են կատարել»,- նշված է հայտարարությունում։

Թեմը տեղեկացնում է, որ Թալին համայնքի ղեկավար Տավրոս Սափեյանը հայտնել է նաև, թե 2026 թվականի հունվարի 6-ին Սուրբ Ծննդյան և Աստվածահայտնության տոնին նվիրված Սուրբ և Անմահ Պատարագին իր անձը պետք է ներկայացվի որպես Թալինի Սուրբ Աստվածածին եկեղեցու խաչքավոր, ինչպես նաև պնդել է, որ Պատարագի ընթացքում պետք է զեղչվի Ամենայն Հայոց Կաթողիկոսի անունը։

«Արագածոտնի թեմն իր մտահոգությունն է հայտնում վերոնշյալ անախորժ պատմության և համայնքապետի հակականոնական պնդումների կապակցությամբ և հիշեցնում է, որ Հայաստանյայց Առաքելական Սուրբ Եկեղեցու օրինական գործունեությունը կամ կրոնական ծեսի կատարումը խոչընդոտելը հանդիսանում է քրեական հանցագործություն։ Հայ Եկեղեցում խաչքավոր կարող է լինել միայն նա, ով ամբողջությամբ ընդունում է Հայ Առաքելական Սուրբ Եկեղեցու կարգուկանոնը, սրբազան ավանդությունը և նվիրապետությունը»,- ընդգծվում է հայտարարությունում։

Արագածոտնի թեմը հորդորում է հավատավոր ժողովրդին պահպանել հանդարտություն և չտրվել սադրիչ նախաձեռնությունների ազդեցությանը։

«Եկեղեցի ուղղված ձեր քայլերը թող դրսևորում լինեն միայն աղոթքի, համերաշխության ու միասնականության։ Սուրբ Եկեղեցու անսասանությունը ձեր հավատարմությունն է առ հայրենին և առ մեր Սուրբ Եկեղեցին։ Տերը օգնական հայոց ազգին»,- նշված է հայտարարության ավարտին։