Քաղաքականություն
01.01.2026 | 13:312026 թվականի հունվարի 1-ի առավոտյան ՀՀ վարչապետ Նիկոլ Փաշինյանը ֆեյսբուքյան ուղիղ եթերով շնորհավորել է քաղաքացիների Ամանորը՝ ցուցադրելով առատ ձյունով պատված կառավարական ամառանոցի տարածքը և կիսվելով տոնական տպավորություններով։
Վարչապետը նշել է, որ վաղուց նման ձյունառատ տեսարան չէր հիշում, և որ «ձյունը վերահաստատում է հեքիաթը»: Անդրադառնալով նախորդ գիշերվա տոնակատարությանը՝ նա ընդգծել է.
«Ամանորի գիշերը Հանրապետության հրապարակում եղել է շուրջ 21,000 մարդ։
Մթնոլորտը եղել է շատ պոզիտիվ, ներկա են եղել բազմաթիվ զբոսաշրջիկներ, սփյուռքահայեր (Ռուսաստանից, ԱՄՆ-ից) և հայաստանյան ընտանիքներ՝ մի քանի սերունդներով (տատիկ-պապիկներ, ծնողներ, թոռներ)»։
Վարչապետը հատուկ շեշտել է, որ նման միջոցառումների պահանջարկը մեծանում է, և կառավարությունն ու քաղաքապետարանը պետք է դա պահեն օրակարգում։
Իր խոսքի հիմնական մասում Փաշինյանն անդրադարձել է հանրային տրամադրությանը և խնդիրների ընկալմանը։ Նա նշել է, որ բարձր տրամադրությունը չի նշանակում պրոբլեմների բացակայություն, քանի որ «աշխարհում չկա գեթ մի երկիր, որտեղ խնդիրներ չկան»։
Վարչապետը առաջարկել է 2026 թվականի հունվարի 1-ից պայմանավորվել մեկ բանի շուրջ.
«Եկեք պրոբլեմներին վերաբերվենք որպես մեր կյանքի առօրյայի մաս, որով մենք ուղղակի պետք է զբաղվենք։ Եթե էդ պրոբլեմները չլինեն, մեր կյանքը կլինի անհետաքրքիր և անիմաստ… Քաղաքակրթությունը ինքը նաև պրոբլեմներ ստեղծող երևույթ է, զարգացումը՝ պրոբլեմներ ստեղծող երևույթ է»։
Նրա խոսքերով՝ մեկ խնդրի լուծումը ծնում է նոր խնդիրներ, և դա է կյանքի ու զարգացման բանաձևը.«Երբ մի պրոբլեմ լուծում ես, էդ պրոբլեմի լուծումից հետո գալիս, առաջանում է երեք նոր պրոբլեմ, որը պետք է լուծես… Եթե չկա պրոբլեմ, ուրեմն չկա կյանք»։
Որպես օրինակ՝ Նիկոլ Փաշինյանը բերել է «300 դպրոց» ծրագիրը, որը նախատեսված է ավարտել 2026-ին։
«300 դպրոցը կավարտենք 2026 թվականին, և պարզվեց՝ 300 դպրոցը մեզ անհրաժեշտի ընդամենը 20 տոկոսն է»,– նշել է նա։
Եզրափակելով խոսքը՝ վարչապետը կոչ է արել պրոբլեմների լուծմանը մոտենալ պոզիտիվ տրամադրվածությամբ, քանի որ երջանկությունը, ազատությունը, ինքնիշխանությունը և պետականությունը կախված են նրանից, թե ինչպես ենք մենք կարողանում առնչվել այդ խնդիրների հետ։
«Պրոբլեմների լուծման և այդ չարչարանքի արդյունքը կլինի հաջողության բերկրանքը»,– ասել է Փաշինյանը և ևս մեկ անգամ շնորհավորել Ամանորն ու Սուրբ Ծնունդը։
