29.07.2026 | 00:56
«Արարատ-Արմենիան» դուրս եկավ Չեմպիոնների լիգայի որակավորման երրորդ փուլ. ՏԵՍԱՆՅՈՒԹ
Ամանորը՝ ծառայության մեջ․ պայմանագրային զինծառայողների մաղթանքները 2026-ին․ ՏԵՍԱՆՅՈՒԹ
Քաղաքականություն
01.01.2026 | 15:00
Ամանորի նախաշեմին Factor TV-ն այցելել է Պաշտպանության նախարարության N զորամաս, որտեղ պայմանագրային զինծառայողները կիսվել են իրենց մտքերով, զգացողություններով և բարեմաղթանքներով՝ 2026 թվականը դիմավորելով ծառայության մեջ։
Պայմանագրայինները նշում են՝ ծառայության ընթացքում Ամանորը բոլորովին այլ է․ զգացմունքներն ավելի անկեղծ են, իսկ պատասխանատվության զգացումը՝ ավելի խորը։
«Ծառայության Ամանորը տարբերվում է, զգացմունքներն անկեղծ ու ավելի խորն են։ Համեմատելու չէ, բառերով նկարագրելու էլ չէ։ 2026-ը թող լինի մեր ամբողջ ազգի միասնական նպատակների իրականացման տարի։ Լինենք համախմբված, և մեր նպատակները լինեն անկոտրում»,- ասում է պայմանագրային զինծառայող Աննա Ղազարյանը։
19-ամյա պայմանագրային Կարինե Միրոյանն ամանորյա իր մաղթանքում շեշտում է խաղաղության կարևորությունը։
«Ամանորյա մաղթանքը որպես զինծառայող՝ միայն խաղաղությունն է հայրենիքիս՝ Հայաստանի սահմանին և դիրքերին»,- նշում է նա։
Կապիտան Աննա Վարդանյանն իր հերթին ընդգծում է, որ Նոր տարին, նախևառաջ, ներքին վիճակ է՝ անկախ ծառայության վայրից։
«Ես ամեն Նոր տարվա հետ նորովի եմ հավատում հրաշքներին և վստահ եմ, որ իմ մտքի ուժը կարողանում է ինձ առաջ մղել։ Բնականաբար, այդ տեսանկյունից բոլորովին կապ չունի, թե ես որտեղ եմ դիմավորում Նոր տարին։ Նոր տարին՝ որպես տրամադրություն, որպես շունչ, մշտապես իմ ներսում է։ Շատ հանգիստ եմ դիմավորում Նոր տարին այստեղ՝ զորամասում, ինչպես անցած, այնպես էլ այս տարի։ Մենք պետք է ժամանակակից մարտահրավերներին համահունչ մեծ քայլերով առաջ գնանք՝ ի շահ պետականության, ի շահ մեր բանակի կարողանանք լինել օգտակար, կարողանանք լինել մարդ և մնալ մարդ»,- նշում է կապիտան Աննա Վարդանյանը։
Պայմանագրային զինծառայողների խոսքով՝ ծառայության մեջ Նոր տարին դիմավորելը ևս մեկ անգամ ընդգծում է միասնության, հավատքի և պատասխանատվության արժեքը՝ հանուն երկրի և բանակի։
Մանրամասները՝ տեսանյութում։
Արփի Հակոբյան
