Քաղաքականություն
27.12.2025 | 12:12
Արցախի ղեկավարների շինծու գործերով հերթական դատական նիստն է տեղի ունեցել։ Բաքվի զինվորական դատարանում նիստը նախագահող դատավոր Զեյնալ Աղաևը հայտարարել է , որ դատական նիստը կշարունակվի հայ գերիների եզրափակիչ խոսքով։
Մասնավորապես, իր եզրափակիչ խոսքով հանդես է եկել Արցախի ԱԺ նախագահ Դավիթ Իշխանյանը։ Իր խոսքում նա նշել է, որ համաձայն չէ իրեն առաջադրված մեղադրանքների հետ և ներկայացրել իր հակափաստարկները։
Իշխանյանը հայտարարել է, որ չի մասնակցել մարդկանց բնակության վայրերից վտարմանը, անօրինական բնակեցմանը, ականապատմանը, ագրեսիվ պատերազմի պլանավորմանը, հարձակման նոր ծրագրերի պատրաստմանը, ցեղասպանությանը, խաղաղ բնակիչների ոչնչացմանը, պատերազմի օրենքների և սովորույթների խախտմանը, խաղաղ բնակիչների հետապնդմանը, պատանդ վերցնելուն, միջազգային իրավունքի խախտմամբ ազատազրկմանը, խոշտանգումների կիրառմանը, խաղաղ բնակիչների սպանությանը, գույքի թալանին, հանցավոր կազմակերպությանը մասնակցելուն, զենքի և զինամթերքի անօրինական տեղափոխմանը և այլ հանցագործություններին։
Նա խոսել է նաև Բերդաշենում 1991 թվականի նոյեմբերի 20-ին տեղի ունեցած ողբերգության մասին։ Նշել է, որ ադրբեջանական ուղղաթիռի պայթյունը, որը տեղափոխում էր բարձրաստիճան պաշտոնյաների, ավիավթար էր։
Իր ելույթում Իշխանյանը անդրադարձել է նաև մեղադրական եզրակացության մեջ գերիների և պատանդների հետ կապված մեղադրանքներին։ Նա նշել է, որ ինքը որևէ շփում չի ունեցել ադրբեջանցի գերիների կամ պատանդների հետ։
«Ես ինձ մեղավոր չեմ համարում, ես որևէ հանցագործություն չեմ կատարել», – իր ելույթի վերջում հայտարարել է Իշխանյանը։
Նախագահող դատավոր Աղաևը նշել է, որ սրանով եզրափակիչ ելույթներն ավարտվել են։ Նա դիմել է կողմերին (մեղադրանքի կողմին, տուժող կողմին և պաշտպանությանը)՝ հարցնելով, թե արդյոք նրանք կներկայացնեն դատավճռի նախագիծ։ Կողմերը նշել են , որ չեն ներկայացնի դատավճռի նախագիծ։
Դրանից հետո նախագահող դատավորը հայտարարել է դատավարության ավարտի մասին։
Դատավորների կազմը հեռացել խորհրդակցական սենյակ։ Նշվում է, որ դատավճիռը կհրապարակվի խորհրդակցությունից վերադառնալուց հետո։
Թարգմանությունը՝ Էմմա Չոբանյանի
