Եթե վարչապետը մեղադրում է՝ ԿԳԲ գործակալ են, պահանջում եմ փաստ ներկայացնել, թե չէ սուտ մատնություն է․ Դավիթ Անանյան․ ՏԵՍԱՆՅՈՒԹ

«Այդ 10 հոգևորականները դարձել են իշխանության գործիքը»,- Factor TV-ի եթերում պնդում է «Միասնության թևեր» քաղաքական նախաձեռնության հիմնադիր անդամ Դավիթ Անանյանը՝ անդրադառնալով Հայ Առաքելական եկեղեցու շուրջ ստեղծված իրավիճակին, մասնավորապես՝ 10 եպիսկոպոսների կողմից Ամենայն Հայոց Կաթողիկոս Գարեգին Բ-ի հրաժարականի պահանջին։ Անանյանը համոզմունք է հայտնել, որ այս գործընթացը ուղղորդվում է իշխանությունների կողմից։

Ըստ Դավիթ Անանյանի՝ եկեղեցականների բողոքը ոչ թե ներեկեղեցական ինքնամաքրման գործընթաց է, այլ իշխանության կողմից հրահրված «հակաեկեղեցական արշավի շարունակություն»։

«Մի բան է, երբ գործող իշխանությունն է հայտարարում, որ ինքը [Կաթողիկոսը] պետք է գնա և այլն, մի բան է, որ դա, ըստ էության, չակերտավոր ասած, պատվիրակվում է 8-10 եպիսկոպոսի, արքեպիսկոպոսի։ Սա արդեն նույն ձեռագրի քողարկված տարբերակն է։ Ես ցավում եմ Հայ Առաքելական եկեղեցու բարձրաստիճան այդ 8-10 եպիսկոպոս-արքեպիսկոպոսների համար, որովհետև իրենք դարձել են, ըստ էության, գործիք այսօրվա իշխանությունների ձեռքին»,- նշել է Անանյանը։

Նա ընդգծել է, որ այդ հոգևորականները վերցրել են Նիկոլ Փաշինյանի կողմից հրահրած արշավի «փոխանցիկ դրոշը» և իրականացնում են այն, ինչ իշխանությունն էր ցանկանում։

«Եթե մարդուն դու արժանացնում ես որոշակի գնահատականների, իրենց վարքագծից ելնելով․․․ Այդ 10 հոգևորականների մեջ կան առնվազն երկուսը, որոնք իմ ընտանիքին հարազատ են։ Եվ ես այն, ինչ հիմա ասում եմ, ասում եմ շատ խորը ցավով․․․ Մենք երբեք չենք վիճարկել այս կամ այն հոգևորականի կենցաղը․․․ Իսկ այդ 10 հոգևորականները 10-15 տարի առաջ չէի՞ն տեսնում իրավիճակը։ Եթե այն ժամանակ լռել են, իսկ այսօր խոսում են, նշանակում է՝ այն ժամանակվա լռությունը և այսօրվա խոսելը ուղղորդված է»,- պնդել է բանախոսը։

Խոսելով Բագրատ արքեպիսկոպոս Գալստանյանի առաջնորդած շարժման մասին՝ Անանյանը կարծիք է հայտնել, որ եկեղեցին որպես կառույց ամբողջությամբ չի կանգնել այդ քաղաքական պայքարի թիկունքում։
«Ես կարծում եմ, որ երբ Բագրատ արքեպիսկոպոսը մտավ քաղաքական պայքարի մեջ, եկեղեցին այդպես էլ չօրհնեց նրան․․․ Բագրատ Սրբազանը այդ շարժման սրբազան առաջնորդությունը տանում էր որպես հոգևորական՝ ՀՀ քաղաքացի, ոչ թե թեմակալ առաջնորդի կեցվածքով»,- ասել է Անանյանը։
Քաղաքական դաշտի վերաբերյալ Դավիթ Անանյանը վերահաստատել է իր տեսակետը, որ նախկին երեք նախագահները պետք է դուրս գան ակտիվ քաղաքական պայքարից՝ իշխանությանը զրկելու համար «նախկիններով» վախեցնելու հնարավորությունից։

«Որպեսզի Նիկոլ Փաշինյանը հեռանա, պետք է կտրել իրեն այդ սնունդից՝ քաղաքական սնունդից։ Հետևաբար, պետք է երեք նախագահները հրաժարվեն այդ պայքարից»,- նշել է նա։

Անանյանը նաև համոզմունք է հայտնել, որ Փաշինյանը հաջորդ ընտրություններում հաղթելու շանս չունի․ «Փաշինյանը չունի այդպիսի որևէ հնարավորություն»։

Հարցազրույցն ամբողջությամբ՝ տեսանյութում։

Ռոբերտ Անանյան