15.05.2026 | 23:20
Հուլիսի 1-ից Երևան-Բուխարեստ նոր ուղիղ չվերթ կմեկնարկի
Ռուբեն Վարդանյանի գործով դատավարությունը մոտենում է ավարտին․ կողմերը պատրաստվում են եզրափակիչ ելույթներին
Քաղաքականություն
16.12.2025 | 22:14
Արցախի նախկին պետնախարար Ռուբեն Վարդանյանի նկատմամբ հարուցված շինծու գործերով հերթական դատական նիստն է կայացել Բաքվի զինվորական դատարանում։ Վարդանյանի փաստաբան Էմիլ Բաբիշևը ներկայացրել է երկու միջնորդություն։
Նա նշել է, որ սեպտեմբերի 16-ին կայացած դատական նիստի ժամանակ Վարդանյանը մի քանի միջնորդություններ է ներկայացրել։ Դրանցից մեկը վերաբերում էր Կարմիր խաչի միջազգային կոմիտեի (ԿԽՄԿ) ներկայացուցչի որպես վկա ներկայությանը և նրա հարցաքննությանը։ Նախաքննության և դատավարության ընթացքում ԿԽՄԿ ներկայացուցիչները տարբեր ժամանակներում այցելել են Ռուբեն Վարդանյանի ժամանակավոր կալանքի վայր և հանդիպել նրա հետ, օգնել են նրան սնունդով և հագուստով, ինչպես նաև՝ կապ են պահպանել նրա ընտանիքի հետ։
Փաստաբանը նշել է, որ Վարդանյանի կարծիքով, Կոմիտեի ներկայացուցչի՝ դատավարությանը մասնակցությունն ապահովելու հիմնական նպատակը քրեական վարույթում նրա կարգավիճակը որոշելն է: Հետևաբար, նա խնդրում է օգնություն՝ ԿԽՄԿ ներկայացուցչի դատավարությանը որպես վկա մասնակցությունն ապահովելու համար։ Ռուբեն Վարդանյանը ևս նշել է, որ պաշտպանում է իր փաստաբանի միջնորդությունը։ Դատախազն իր հերթին խնդրել է դատարանին մերժել միջնորդությունը։
Կողմերին լսելուց հետո դատարանը խորհրդակցել է տեղում և կայացրել որոշում։
Որոշման համաձայն՝ միջնորդությունը մերժվել է։ Որոշումը հիմնավորելիս նախագահող դատավոր Զեյնալ Աղաևը նշել է, որ միջնորդությունը կապ չունի տվյալ գործի հետ, չի հանդիսանում ապացույց և, հետևաբար, մերժվել է։
Այնուհետև փաստաբան Էմիլ Բաբիշովը դատարանին ներկայացրել է երկրորդ միջնորդությունը։ Նա նշել է, որ քրեական գործի նյութերում կա Ռուբեն Վարդանյանի կողմից օգտագործվող գրասենյակի և տան զննման արձանագրություն, ինչպես նաև տեսագրություններ պարունակող սկավառակներ։ Պաշտպանական կողմը պնդել է, որ քանի որ անհրաժեշտ է պարզաբանել համապատասխան քննչական գործողությունների ընթացքում կատարված տեսագրություններում առկա որոշակի փաստեր, քննիչը պետք է ապահովի վկայի ներկայությունը դատարանում և նրա հարցաքննությունը։
Դատարանը, կողմերի փաստարկները լսելուց հետո այս միջնորդությունը ևս մերժել է։
Նախագահող դատավոր Զեյնալ Աղաևը լսել է կողմերի կարծիքները դատական քննության ավարտի վերաբերյալ։ Կողմերը նշել են, որ իրենք առարկություններ չունեն դատավարության քննության ավարտի և եզրափակիչ ելույթների սկսման վերաբերյալ։
Պետական մեղադրողները դատարանից ժամանակ են խնդրել իրենց ճառը պատրաստելու համար։ Հաջորդ դատական նիստը նշանակվել է դեկտեմբերի 18-ին։
Թարգմանությունը`Էմմա Չոբանյանի
