Սյունիքի՝ կոմունիկացիոն հաբ լինելը ԱՄՆ-ն և ՌԴ-ն կքննարկեն․ նոր զարգացում կլինի Ուկրաինայում լուծմամբ․ ՏԵՍԱՆՅՈՒԹ

«Քաղաքական գործընթացները տարածաշրջանում և աշխարհում զարգանում են ԱՄՆ-ի և Ռուսաստանի միջև բանակցությունների համատեքստում, որոնց նպատակն է հանգուցալուծում գտնել, այդ թվում՝ Ուկրաինայի հարցում։ Այս գործընթացներում Ռուսաստանը կարող է ձգտել այլ շահաբաժիններ ստանալ տարբեր տարածաշրջաններում, այդ թվում՝ Հարավային Կովկասում»,- այսպիսի տեսակետ է հայտնել քաղաքագետ Սարո Սարոյանը Factor TV-ին տված հարցազրույցում։

Սարոյանի խոսքով, Թրամփի վարչակազմի ջանքերն ուղղված են Ռուսաստանին այնպիսի բանակցային դաշտ բերելուն, որտեղ հնարավոր կլինի համատեղ շահեր իրացնել։ «Թրամփի ողջ ջանքերն ուղղված են, որպեսզի, ի վերջո, Ռուսաստանին բերեն այնպիսի բանակցային դաշտ, որտեղ համատեղ շահերը կկարողանան իրենք իրացնել, և դա կծառայի ամերիկյան քաղաքականությանը գլոբալ առումով»,- նշել է նա։
Այս համատեքստում է քաղաքագետը դիտարկում նաև «Թրամփի ուղի» նախագիծը, որը, նրա կարծիքով, կարող է ռուս-ամերիկյան շահերի տիրույթում քննարկվել։ Նա չի բացառում, որ Ռուսաստանը, ընդհանուր համաձայնությունների դիմաց, կարող է «փորձել նաև այլ շահաբաժիններ ձեռք բերել այլ տարածաշրջաններում»։ Սա, ըստ նրա, կարող է վերաբերել նաև Հարավային Կովկասին և Սյունիքով անցնելիք ճանապարհներին։

Քաղաքագետի կարծիքով, Ուկրաինայում տեղի ունեցածը ցույց է տալիս, որ նոր տարածաշրջաններ կարող են «զոհաբերվել» ամերիկյան քաղաքականության տեսանկյունից։ Նա զուգահեռներ է անցկացնում ԱՄՆ-ի կողմից Ուկրաինային «պարտադրանքի լեզվով» դեպի բանակցություններ մղելու և հնարավոր այլ զարգացումների միջև։ «Ոչ մի երաշխիք չունենք, որ նույնը չի կարող լինել այլ տարածաշրջաններում»,- նշել է Սարոյանը։

Քաղաքագետը նաև կարծիք է հայտնել, որ ԱՄՆ-ի կողմից Ուկրաինայում ընտրություններ անցկացնելու թեմայի բարձրացումը «դամոկլյան սուր» է, որը կախված է Կիևի վրա՝ որպես զգուշացում, որ դիմադրելու դեպքում կարող են գործի դրվել քաոսի հանգեցնող լծակներ։
Խոսելով Հայաստանի արտաքին քաղաքականության մասին՝ Սարոյանը գնահատել է, թե այն շատ հստակ ուղղություն ունի։ «Շատ բացահայտ Հայաստանը ինտեգրվում է թուրանական աշխարհին։ Այդ կուրսն է տարվում, և իրենք չեն էլ թաքցնում արդեն»,- ասել է քաղաքագետը՝ հավելելով, որ այս գործընթացը վերաբերում է թե՛ քաղաքական, թե՛ տնտեսական, թե՛ էներգետիկ և տրանսպորտային համակարգերին։

Անդրադառնալով այն հարցին, որ ՀՀ վարչապետը խոսում է արտաքին քաղաքականության բալանսավորման մասին, Սարոյանը մեկնաբանել է.

«Ինքը նկատի ունի, որ գործակցելով այդ տարբեր աշխարհաքաղաքական կենտրոնների հետ, կարող է երաշխավորել, որ որպես սուբյեկտ Հայաստանի Հանրապետությունը այդ թուրանական աշխարհում չի վերանա-գնա, որպես միավոր»։

Քաղաքագետի համոզմամբ, այս քաղաքականության հետևանքով հայկական ինքնության դրսևորումները կարող են կարճ ժամանակահատվածում «ջնջվել»։ «Հայկականության բոլոր տեսակի բաները կարճ ժամանակահատվածում ջնջվելու են։ Այն ամենը, ինչ կապված է հայկական դիմագծերի հետ՝ ինքնության հետ, էթնիկության հետ, պատմության հետ, արժեքային դաշտում, հոգևոր հիմքերում»,- կանխատեսել է նա։

Հարցազրույցն ամբողջությամբ՝ տեսանյութում։

Ռոբերտ Անանյան