ԱՄՆ դեսպանը վկայեց՝ «Թրամփի ուղու» շուրջ գործնական քայլեր են արվում․ ռեգիոնում նոր էջ է բացվել տնտեսական գործակցության․ Համբիկ Սարաֆյան․ ՏԵՍԱՆՅՈՒԹ

Սոցիալ Դեմոկրատ Հնչակյան կուսակցության (ՍԴՀԿ) Կենտրոնական վարչության ատենապետ Համբիկ Սարաֆյանը Factor TV-ի եթերում անդրադարձել է Հայ Առաքելական եկեղեցու և ՀՀ իշխանությունների հարաբերություններին, ինչպես նաև տարածաշրջանային զարգացումներին։
Սարաֆյանը մեկնաբանել է ՍԴՀԿ-ի տարածած հայտարարությունը, որում, մասնավորապես, նշված էր. «Ներկա ճգնաժամի գլխավոր պատճառը քաղաքական է և սկիզբ է առել այն պահից, երբ Գարեգին Երկրորդ կաթողիկոսը միացել է վարչապետի հրաժարականի պահանջին»։
ՍԴՀԿ ԿՎ ատենապետի կարծիքով՝ խնդիրը ոչ թե եկեղեցու կողմից երկրի համար կարևոր հարցերում կարծիք հայտնելն է, այլ այն, որ հոգևոր կառույցը դարձել է քաղաքական պայքարի կողմ։
«Խնդիրը կայանում է նրանում, որ երբ կաթողիկոսը արեց այդ հրաժարականի պահանջը 2021 թվականին՝ ընտրությունների նախօրեին, և հետո տեղի ունեցան ընտրությունները [․․․], խոսքը վերածվեց գործի, երբ իսկապես եկեղեցին դարձավ հակամարտող կողմերից մեկը քաղաքական դաշտում։ Այսինքն՝ դարձավ ընդդիմադիր այս խմբավորման, կարելի է ասել, խորհրդատուն և նաև ղեկավարը։ Այստեղ է, որ մենք խնդիր ունենք»,- նշել է Սարաֆյանը։
Նա ընդգծել է, որ եկեղեցին՝ որպես համազգային կառույց, չպետք է ներքաշվի քաղաքական գործընթացների մեջ և դառնա որևէ կողմի մասնակիցը, քանի որ այն պետք է պատկանի բոլորին։
Անդրադառնալով եկեղեցու ներսում տիրող իրավիճակին և հոգևորականների կողմից հնչող քննադատություններին՝ Սարաֆյանը նկատել է, որ եկեղեցու ղեկավարությունը համարժեք չի արձագանքում բացահայտումներին։
«Բոլոր բացահայտումներից հետո որևէ տնօրինում տեղի չի ունենում։ Նախևառաջ բացարձակապես Մայր Աթոռը չի արձագանքել այդ մեղադրանքներին կամ այդ հրապարակումներին։ [․․․] Վերջիվերջո, եթե հանցախումբ է ձևավորվում, այդ հանցախումբը աշխատանք է տանում»,- ասել է բանախոսը՝ հավելելով, որ փոխարենը պատժվում են այն հոգևորականները, ովքեր ընդվզում են այդ համակարգի դեմ։
Խոսելով տարածաշրջանային խնդիրների և մասնավորապես «Զանգեզուրի միջանցքի» թեմայի մասին՝ Համբիկ Սարաֆյանը համոզմունք է հայտնել, որ Ադրբեջանը չի դիմի ռազմական ագրեսիայի այդ նպատակով, քանի որ դա դեմ է Արևմուտքի շահերին։
««Զանգեզուրի միջանցքը» չի լինելու, որովհետև Արևմուտքը դա թույլ չի տալու։ [․․․] Նրանք [Ադրբեջանը] այդքան հիմար չեն, որովհետև նրանց համար ոչ մի շահ չկա այդպիսի բան անելուց, երբ կօգտվեն բոլոր երկրները, և՛ Ադրբեջանը, և՛ Հայաստանը, և՛ Թուրքիան, և՛ նույնիսկ Ամերիկան այդ ճանապարհների բացումից»,- նշել է ՍԴՀԿ ներկայացուցիչը։
Ըստ Սարաֆյանի՝ ներկայումս ընթանում է անցում պատերազմական հռետորաբանությունից դեպի տնտեսական համագործակցության տրամաբանություն, ինչը բխում է բոլոր կողմերի շահերից։

Զրույցն ամբողջությամբ՝ տեսանյութում։

Ռոբերտ Անանյան