Հատուկ ծառայությունները հանցանքով են բացահայտում հանցանքը, անընդունելի՛ է․ կոչ եմ անում ՀԱԵ բարեփոխողներին՝ բարեփոխվեք․ Արմեն Մարտիրոսյան․ ՏԵՍԱՆՅՈՒԹ

«Անտարես» հրատարակչության տնօրեն Արմեն Մարտիրոսյանը Factor TV-ի եթերում անդրադարձել է վերջերս մի խումբ մտավորականների և հանրային գործիչների տարածած հայտարարությանը, որին ինքը ևս միացել է, և որով կոչ է արվում իշխանությանը՝ զերծ մնալ «Հայ Առաքելական եկեղեցու դեմ ոտնձգություններից և ինքնիրավչությունից»։

Մարտիրոսյանը նշում է, որ մտավորականի դերը ցանկացած կառույցի կամ իշխանության գործողություններին սթափ հայացք գցելն է, այլ ոչ թե կուրորեն պաշտպանելը։
Նա կարծիք է հայտնել, որ Հայ եկեղեցին լուրջ բարեփոխումների կարիք ունի, ինչը պետք է տեղի ունենար ներսից․

«Եկեղեցին բարեկարգման անհրաժեշտություն ունի։ Ես՝ որպես մշակութային տիրույթի, կոդերի կառավարման մասնագետ, հստակ ասում եմ, որ եկեղեցու այս ռեֆորմը կարող է բերել տնտեսության աճի, սոցիալական արդարության մակարդակի բարձրացման, էկոլոգիայի դրական ընթացքին։ Բայց դա պետք է արվի եկեղեցու ներսից։ Քանի որ չի արվել, բնական է, որ դրսից ճնշում պետք է լինի»,- նշել է նա։
Մարտիրոսյանը անդրադարձել է իշխանության կողմից եկեղեցու ներքին գործերին միջամտության մասին պնդումներին և իշխանության հակադարձումներին․

«Եթե դուք որոշել եք, որ այն հարցերը, որը պետք է ապացուցողական բազա ստեղծեիք, հավաքեիք և օրինական գործընթաց իրագործեիք, դրա փոխարեն անում եք այն, ինչ որ անում եք, սա ես անընդունելի եմ համարում։ Չի կարելի ըմբոստ եկեղեցականին, ով ձեր ասածը չի անում, յոթ տարի առաջվա ենթադրյալ գործողության համար կալանավորել»,- ասել է Մարտիրոսյանը՝ միևնույն ժամանակ ընդգծելով, որ իշխանության գործողությունները պետք է լինեն բացառապես օրինական դաշտում։

Արմեն Մարտիրոսյանը քննադատել է նաև գործող իշխանությանը՝ համակարգային փոփոխություններ չիրականացնելու համար։ Նրա կարծիքով՝ Նիկոլ Փաշինյանը, ցանկանալով լինել «բարի», ձախողել է իրական ռեֆորմները։

«Նիկոլ Փաշինյանը պատերազմից առաջ ուզում էր թե՛ Հայաստանի համար, թե՛ Ղարաբաղի համար լավ բաներ անել, բայց ասում են՝ ճանապարհը դեպի դժոխք սալապատված է բարի ցանկություններով։ Բարի ցանկություն ունենալը դեռ հիմք չէ, որ դու այսինչ բանը փոխես։ Դու պետք է ունենաս գործիքակազմ, որ այդ քո փոփոխությունները ավելի մեծ ավերի չբերեն, քան այս վիճակն է»,- նշել է նա։

Ըստ բանախոսի՝ խնդիրը ոչ թե անձերի, այլ մշակույթի և արժեհամակարգի մեջ է։ Նա պնդում է, որ հասարակությունը չի փոխվել, և շարունակում է առաջնորդվել նույն՝ «նաղդը թողած նիսիայի հետևից ընկնելու» հոգեբանությամբ։

«Ձեր անհեռատեսությունը բերում է այսպիսի խնդիրների։ Նախորդ իշխանություն, քո անհեռատեսությունը բերում է այս խնդիրներին, որ Քոչարյանը դուրս հանեց Ղարաբաղը բանակցային տիրույթից, որ մարտի 1 արեցին, որ հոկտեմբերի 27 արեցին․․․ Դա նշանակում է՝ դուք չեք տիրապետում իրավիճակի»,- եզրափակել է Արմեն Մարտիրոսյանը։

Հարցազրույցն ամբողջությամբ՝ տեսանյութում։
Ռոբերտ Անանյան