30.10.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Փաշինյանը թաքցնում է իր գլխավոր հանցագործությունը․ ի՞նչ ես պատասխանել 2019-ի պլանին, դա՛ հրապարակիր․ Լևոն Զուրաբյան․ ՏԵՍԱՆՅՈՒԹ
Քաղաքականություն
02.12.2025 | 17:35
Հայ ազգային կոնգրեսի փոխնախագահ Լևոն Զուրաբյանը Factor TV-ի եթերում քննադատել է իշխանությունների վարած քաղաքականությունը Հայ Առաքելական Եկեղեցու ուղղությամբ՝ այն որակելով որպես ապօրինի միջամտություն և սահմանադրական կարգի խախտում։ Նա նաև պնդել է, որ Նիկոլ Փաշինյանը հանրությունից թաքցրել է 2019 թվականի բանակցային կարևոր փաստաթղթերը։
Անդրադառնալով Կաթողիկոսի հրաժարականը պահանջող հոգևորականների գործողություններին և իշխանության քայլերին, Զուրաբյանը նշել է, որ պետությունը քրեորեն պատժելի արարքներին ընթացք չի տալիս՝ դրանք ծառայեցնելով իր քաղաքական նպատակներին, ինչպիսին օրինակ՝ արքեպիսկպոս Խաչատրյանին վերագրվող տեսանյութերը։
«Այդ մարդկանց արարքը Քրեական օրենսգրքի 204 հոդվածով քրեորեն պատժելի արարք է։ Քրեական օրենսգիրքը սահմանում է պատժելիություն մարդու անձնական կամ ընտանեկան գաղտնիք համարվող տեղեկությունները, առանց նրա համաձայնության, օգտագործելու, իրացնելու կամ հայտնելու համար»,- ասել է Զուրաբյանը։
Ըստ ՀԱԿ փոխնախագահի՝ Նիկոլ Փաշինյանը «Քննչական կոմիտեն դարձրել է իր դուքյան» և իրավական լծակներն օգտագործում է Եկեղեցու ներքին կյանքին միջամտելու համար, ինչը հակասահմանադրական է։
«Պետությունը իրավունք չունի չմիջամտելու, եթե խոսքը գնում է քրեորեն պատժելի արարքի մասին։ Այսինքն՝ Նիկոլ Փաշինյանը Քննչական կոմիտեն դարձրել է իր դուքյանը․․․ Սա 441 հոդվածի խախտում է քրեական օրենսգրքի՝ այն, ինչ անում է Փաշինյանը»,- նշել է նա։
Զուրաբյանը հիշեցրել է, որ թեև ՀԱԿ-ը ժամանակին քննադատել է եկեղեցական որոշ գործիչների վարքագիծը, սակայն Լևոն Տեր-Պետրոսյանի իշխանության օրոք երբեք թույլ չի տրվել պետական միջամտություն Եկեղեցու ներքին գործերին․ «Դա երբեք չի եղել մեր ոճը։ Մենք դրա վրա չենք հիմնվել ու երբեք նման բաներ չենք ասել»։
Անդրադառնալով կառավարության կողմից այսօր հրապարակված ԼՂ-ի հակամարտության կարգավորման բանակցային փաստաթղթերի ցանկին՝ Զուրաբյանը պնդել է, որ իշխանությունը շարունակում է մանիպուլացնել փաստերը։ Նա շեշտադրել է հատկապես 2019 թվականի առաջարկների կարևորությունը, որոնք, ըստ նրա, Փաշինյանը թաքցրել է։
«Նիկոլ Փաշինյանը թաքցրել է իր գլխավոր հանցագործությունը․․․ Մենք պահանջել ենք հրապարակել 2019 թվականի առաջարկը և Հայաստանի Հանրապետության պաշտոնական պատասխանը այդ առաջարկներին։ Օրինակի համար՝ 1997 թվականի փուլային տարբերակը հրապարակված է, ինչպես նաև հրապարակված են մեր պաշտոնական պատասխանները»,- հայտարարել է Զուրաբյանը։
Ըստ նրա՝ հենց 2019-ին ներկայացված պլանի մերժումն է հանգեցրել պատերազմի, և Փաշինյանը խուսափում է այդ մասին խոսելուց։
Լևոն Զուրաբյանը վերահաստատել է իր պատրաստակամությունը՝ բանավիճելու Նիկոլ Փաշինյանի կամ իշխանության ցանկացած ներկայացուցչի հետ՝ բանակցային գործընթացի և պատերազմի հանգամանքների վերաբերյալ։ Նա նշել է, որ 2023 թվականից հետո իր մուտքը Հանրային հեռուստաընկերություն արգելափակված է։
«Փաշինյանին ասեք՝ ես պատրաստ եմ Տեր-Պետրոսյանի կողմը ներկայացնել, Ազգային կոնգրեսը ներկայացնել այդ բանավեճում»,- եզրափակել է Զուրաբյանը։
Հարցազրույցն ամբողջությամբ՝ տեսանյութում։
Ռոբերտ Անանյան
