Դրսից կոմպրոմատներ եկեղեցու վրա չպիտի՛ լինեն․ իրավապահները պիտի զբաղվեն, որ ՀԱԵ-ն չծառայի օտար երկրներին․ Սոնա Ղազարյան․ ՏԵՍԱՆՅՈՒԹ

Ազգային ժողովի «Քաղաքացիական պայմանագիր» խմբակցության պատգամավոր Սոնա Ղազարյանը Factor TV-ի տաղավարում անդրադարձել է ներքաղաքական վերջին զարգացումներին, եկեղեցի-պետություն հարաբերություններին և իշխանության որդեգրած «Խաղաղության օրակարգին»։ Նրա խոսքով՝ Հայ Առաքելական եկեղեցու՝ որպես ինքնության կարևորագույն մասի «անկախ և անկոմպրոմատ» մնալն առաջնային է պետական անվտանգության համար։

«Երբ ինստիտուտներից որևէ մեկն իր իսկ սահմանած կանոններից դուրս է գալիս, դա այդ ինստիտուտը երրորդ ուժերի նպատակներին ծառայեցնելու ամենահեշտ ձևն է, և դա մեր շահերից է բխում»,- նշել է պատգամավորը՝ հավելելով, որ իրենք չեն ընդունում այն թեզը, թե եկեղեցու դեմ արշավ է իրականացվում։ Սոնա Ղազարյանը նշել է, որ յուրաքանչյուր ինստիտուտ պետք է գործի իր կանոնադրության և առաքելության շրջանակում։ 

Անդրադառնալով Բագրատ արքեպիսկոպոս Գալստանյանի առաջնորդած շարժմանը՝ իշխանական պատգամավորը կարծիք է հայտնել, որ այդ շարժումը և դրա առաջնորդները չեն ճանաչում Հայաստանի Հանրապետությունը որպես պետություն, նաև դրա ինստիտուտները։

«Իրենք ասում են՝ անժամկետ է իրենց պահանջը վարչապետի հեռացման։ Չեն ճանաչում ընտրությունների ինստիտուտը։ Այս մարդիկ, ինչպես մեր հավաքական ընդդիմությունը, չեն ճանաչում Հայաստանի Հանրապետությունը որպես պետություն։ Սա իրենց մեծագույն սխալն է, սխրանքն է և մեծագույն պրոբլեմն է»,- ընդգծել է Ղազարյանը։

Հարցին՝ ինչո՞ւ է իշխանությունը 7 տարի անց դեռ խոսում «նախկիններից», Սոնա Ղազարյանը պարզաբանել է, որ «նախկինը» ոչ թե անձինք են, այլ արժեհամակարգ, որը բնութագրվում է կոռուպցիայով, ժողովրդավարության բացակայությամբ և «շեֆ» լինելու մոլուցքով։ Որպես ապացույց՝ նա մատնանշել է վերջերս պետությանը վերադարձված խոշոր գումարները․

«Մի շաբաթ առաջ 158 միլիոն դոլարին համարժեք գույք վերադարձվել է համայնքին։ Ժողովուրդ ջան, ես հասկանում եմ, որ մեր դեպքում թվերն այնքան են հնչել, որ արժեզրկվել են, բայց 158 միլիոն դոլար․․․ Այս ֆինանսական հոսքերի կտորը, գուցե ինչ-որ ծակեր ունի, որոնք պետք է լավարկվեն մինչև ընտրություններ»,- ասել է պատգամավորը։

Սոնա Ղազարյանը հայտարարել է, որ գործող իշխանության մեծագույն ձեռքբերումը խաղաղությունն է և, նրա պնդմամբ, իրենք միակ քաղաքական ուժն են, որ 2020 թվականի պատերազմից հետո ներողություն է խնդրել ժողովրդից սխալների համար և ստացել մանդատ՝ խաղաղության դարաշրջան բացելու համար։ Նա համեմատություն է անցկացրել նախկին և ներկա քաղաքական իրողությունների միջև, նկատի ունենալով, որ խաղաղության պայմանագիրը նորարարություն է և անհրաժեշտություն։

«Իմ ինքնությունը Հայ Առաքելական եկեղեցին է, իմ ինքնությունը հայոց լեզուն է, իմ ինքնությունը մեր ինքնիշխանությունն է, իմ ինքնությունը Արագածն է, որը ես տեսնում եմ պատուհանից, որովհետև ինքը ձևավորվում է Հայաստանի Հանրապետության մեջ։ Եվ մեր զինվորը պետք է կռվի Արագածի համար»,- հայտարարում է ՔՊ-ական պատգամավորը։

Անդրադառնալով ԵՄ անդամակցության հանրաքվեի թեմային՝ Ղազարյանը նշել է, որ եվրաինտեգրումը լուրջ ճանապարհ է, որը ենթադրում է տնտեսական և անվտանգային դիվերսիֆիկացիա։ Նա ընդգծել է, որ դեպի Եվրոպա ճանապարհն անցնում է Թուրքիայի հետ սահմանի բացմամբ և խաղաղության պայմանագրի կնքմամբ։

Հարցազրույցն ամբողջությամբ՝ տեսանյութում։

Ռոբերտ Անանյան