31.10.2026 | 12:28
Վահան Բիչախչյանը խաղադաշտ է վերադարձել շուրջ 3 ամսվա ընդմիջումից հետո. ՏԵՍԱՆՅՈՒԹ
Պապոյանը Հնդկաստանի առևտրի նախարարի հետ քննարկել է տնտեսական համագործակցության ընդլայնման նոր հնարավորությունները
Տնտեսություն
14.11.2025 | 21:28
Հնդկաստանի առևտրի և արդյունաբերության նախարար Պիյուշ Գոյալի հետ հանդիպման ժամանակ ՀՀ էկոնոմիկայի նախարար Գևորգ Պապոյանը ներկայացրել է Հայաստանի բիզնես միջավայրի առավելությունները՝ ընդգծելով թանկարժեք քարերի, ոսկերչության, դեղագործության, էներգետիկայի և զբոսաշրջության ոլորտներում համագործակցության խորացման հնարավորությունները։ Կողմերը քննարկել են նաև ուղիղ ավիաչվերթների մեկնարկի և եռակողմ աշխատանքային խմբի ստեղծման նախաձեռնությունը, ինչպես նաև «Խաղաղության խաչմերուկ» նախագծի դերակատարումը տարածաշրջանային կապուղիների ձևավորման մեջ։ Այս մասին տեղեկացնում են ՀՀ էկոնոմիկայի նախարարությունից։
«Հանդիպմանը ներկա է եղել նաև Հնդկաստանի Հանրապետությունում Հայաստանի Հանրապետության արտակարգ և լիազոր դեսպան Վահագն Աֆյանը։
Քննարկվել են Հայաստանի և Հնդկաստանի միջև տնտեսական հարաբերությունների ընդլայնման և առևտրաշրջանառության ավելացման հնարավորությունները։ Երկկողմ համագործակցության ուղղությունների թվում հատկապես կարևորվել է թանկարժեք քարերի և ոսկերչության ոլորտը։ Այս համատեքստում Գևորգ Պապոյանն իր գործընկերոջը ներկայացրել է Հայաստանում ստեղծված կայուն բիզնես միջավայրը, հարկային արտոնությունները, մրցունակ առևտրային պայմաններն ու մաքսատուրքային առավելությունները, որոնք դարձնում են Հայաստանը գրավիչ թանկարժեք զարդերի արտադրության և արտահանման համար:
Քննարկումներ են ծավալվել նաև դեղագործության, վերականգնվող էներգետիկայի և զբոսաշրջության ոլորտների վերաբերյալ, մասնավորապես՝ քննարկվել է ուղիղ չվերթների կազմակերպման հնարավորությունը։
Հանդիպման ընթացքում Գևորգ Պապոյանն առաջարկել է ստեղծել Հայաստանի, Հնդկաստանի և GJEPC-ի` Հնդկաստանի թանկարժեք քարերի և ոսկերչական արտադրանքի արտահանման խթանման խորհրդի համատեղ աշխատանքային խումբ՝ համագործակցության առկա հնարավորությունները գործնական հիմքի վրա դնելու նպատակով։
Նախարարը ներկայացրել է նաև «Խաղաղության խաչմերուկ» նախաձեռնությունը՝ շեշտելով, որ այն կարող է դառնալ Հնդկաստան-Ռուսաստան–Եվրոպա նոր կապուղի»,- ասված է հաղորդագրությունում։
