13.05.2026 | 23:03
Երևանի և 10 մարզի մի շարք հասցեներում էլեկտրաէներգիայի անջատումներ կլինեն
ՎԶԵԲ-ն Ամերիաբանկին տրամադրում է 150 մլն եվրո՝ ՓՄՁ-ների ֆինանսավորման ու կանաչ ներդրումների համար․ ՏԵՍԱՆՅՈՒԹ
Տեսանյութեր
14.11.2025 | 20:55
Վճարովի բովանդակություն
Հայաստանում ամենախոշոր վարկային պորտֆելն ունեցող Ամերիաբանկը 150 միլիոն եվրոյի ֆինանսավորում կստանա Վերակառուցման և զարգացման եվրոպական բանկից։ Սա ՎԶԵԲ-ի՝ Հայաստանի մասնավոր հատվածում իրականացրած առայժմ ամենախոշոր գործարքն է, ինչը վկայում է Ամերիաբանկի նկատմամբ միջազգային կառույցների բարձր վստահության մասին։
Այս համագործակցությամբ Ամերիաբանկը մատչելի ու հասանելի վարկեր կտրամադրի միկրո, փոքր և միջին ձեռնարկություններին՝ ուշադրության կենտրոնում պահելով մարզերի հաճախորդներին և նոր վարկառուներին։
«Այսօր մենք ՎԶԵԲ-ի հետ ստորագրում ենք 150 միլիոն եվրո ընդհանուր սահմանաչափով ֆինանսավորման պայմանագիր ՓՄՁ-ների և կանաչ ծրագրերի աջակցության նպատակով: Սա մեր բազմամյա գործընկերոջ՝ ՎԶԵԲ-ի հետ գրանցած ևս մեկ նշանակալի համատեղ ձեռքբերում է, և ուրախ եմ, որ կնքում ենք այս գործարքը, որը թույլ կտա աջակցել հայկական ընկերություններին՝ բավարարելով նրանց ֆինանսավորման կարիքները, ինչպես նաև ընդլայնել մեր բանկի կողմից ֆինանսավորվող կանաչ ծրագրերի քանակը»,- իր խոսքում ասաց Ամերիաբանկի գլխավոր տնօրեն Արտակ Հանեսյանը։
Ֆինանսավորման զգալի մասը կուղղվի կանաչ ներդրումներին՝ բարձրացնելով ռեսուրսների արդյունավետությունը և վերականգնվող էներգիայի արտադրությունը։ Ֆինանսավորումը տրամադրվելու է երկու փուլով՝ 100 միլիոն եվրո, ապա 50 միլիոն եվրո տրանշերով։
«Հատկապես կարևոր է կանաչ ֆինանսավորման սահմանաչափը` 60 միլիոն եվրո, որը կուղղվի կանաչ ներդրումների իրականացմանը։ Նշված ներդրումները թույլ կտան աջակցել Երևանում, ինչպես նաև Երևանից դուրս՝ մարզերում գործող հայկական միկրո, փոքր և միջին ձեռնարկություններին՝ օգնելով նրանց դառնալ ավելի դիմացկուն, ավելի անկախ և ավելի արդյունավետ օգտագործել ռեսուրսները։ Ես ուրախ եմ ստորագրել այս գործարքը։ Լիահույս ենք, որ նշված վարկային գծերը կօգտագործվեն սահմանված ժամկետներում՝ ի նպաստ հայկական ՄՓՄՁ-ների։ Շնորհակալ եմ ՎԶԵԲ-ի հետ երկարամյա համագործակցության համար»,- ընդգծեց ՎԶԵԲ-ի հայաստանյան գրասենյակի ղեկավար Գեորգի Ախալկացին։
Գործարքը համահունչ է ՎԶԵԲ-ի՝ Հայաստանի համար որդեգրած ռազմավարությանը, ֆինանսական ոլորտի ռազմավարությանը, ինչպես նաև կանաչ տնտեսության անցման մոտեցմանն ու գենդերային հավասարության խթանման ռազմավարությանը։
Հայաստանի ֆինանսական համակարգի առաջատար Ամերիաբանկը լայն ներկայացվածություն ունի մարզերում և ակտիվ է թվային լուծումների զարգացման գործում։
«Սա միայն վարկային պայմանագիր չէ, այն վերահաստատումն է ՎԶԵԲ-ի և Ամերիաբանկի միջև երկարամյա, խորը, ընդգրկուն և բովանդակալից համագործակցության՝ ի շահ մեր հաճախորդների բիզնեսի զարգացման և ի նպաստ մեր երկրի բարօրության»,- նկատեց Ամերիաբանկի ֆինանսական ինստիտուտների բաժնի ղեկավար Արա Սարգսյանը։
Ամերիաբանկը Հայաստանի տնտեսության ամենախոշոր վարկատուն է՝ 1,3 տրլն դրամ ընդհանուր համախառն վարկային պորտֆելով։ Իր թվային լուծումների և մեծ քաղաքներում ու երկրի ամենախիտ բնակեցված շրջաններում գտնվող 26 մասնաճյուղերի շնորհիվ Ամերիաբանկը հնարավորություն ունի ֆինանսավորել մասնավոր հատվածի ընկերությունների լայն շրջանակ։
Հայաստանում իր գործունեությունը սկսելուց ի վեր ՎԶԵԲ-ը ներդրել է շուրջ 2,6 միլիարդ եվրո ֆինանսական, կորպորատիվ, ենթակառուցվածքային և էներգետիկ ոլորտների 232 նախագծերում, ընդ որում` ֆինանսավորման 83 տոկոսն ուղղվել է մասնավոր հատվածի զարգացմանը։
Մանրամասները՝ տեսանյութում։
Արփի Հակոբյան
