Խաղաղության շահառուները միայն Հայաստանը և Ադրբեջանը չեն, այլև Վրաստանն ու ողջ տարածաշրջանը. Միրզոյանը՝ Կավելաշվիլիին

Թբիլիսիում Վրաստանի նախագահ Միխայիլ Կավելաշվիլիի հետ հանդիպման ընթացքում ՀՀ ԱԳ նախարար Արարատ Միրզոյանը ընդգծել է, որ Հայաստանի և Ադրբեջանի միջև ձևավորված խաղաղությունը կենսական նշանակություն ունի ոչ միայն երկու երկրների, այլև Վրաստանի և ամբողջ տարածաշրջանի համար․ այն կարող է նոր մակարդակի բարձրացնել փոխկապակցվածությունն ու համագործակցությունը, ներառյալ՝ եռակողմ ձևաչափով։ Այս մասին տեղեկացնում են ՀՀ ԱԳՆ-ից:

«Զրուցակիցները քննարկել են Հայաստանի և Վրաստանի միջև երկկողմ գործընկերության օրակարգի հարցեր:

Երկուստեք ընդգծվել է, որ Հայաստանին և Վրաստանին միավորում են ժողովուրդների միջև ավանդական բարեկամությունն ու ընդհանրությունները, երկու պետությունների տարածքային ամբողջականության և ինքնիշխանության նկատմամբ փոխադարձ հարգանքն, ինչպես նաև կայուն տնտեսական կապերը:

Անդրադառնալով տարածաշրջանային հարցերի՝ նախարար Միրզոյանը նշել է. «Հաստատված խաղաղության շահառուն միայն Հայաստանն ու Ադրբեջանը չեն, այլ նաև Վրաստանն, ընդհանուր տարածաշրջանը: Դրանից կշահի նաև ավելի լայն աշխարհագրությամբ փոխկապակցվածությունը»:
Նախարար Միրզոյանը հավելել է, որ դրա օրգանական շարունակությունը կլինի Հարավային Կովկասում համագործակցության զարգացումն, այդ թվում՝ եռակողմ ձևաչափով: Վրաստանի նախագահն աջակցություն է հայտնել այս տեսլականին:

ՀՀ ԱԳ նախարարը և Վրաստանի նախագահը մտքեր են փոխանակել երկու երկրների միջև գործընկերության զարգացման կարևոր առաքելության ճանապարհին նոր նախաձեռնությունների կյանքի կոչման, արդի պայմաններում մարտահրավերների հաղթահարման գործում արդյունավետ փոխգործակցության հարցերի շուրջ»,- ասված է հաղորդագրությունում:

Ավելի վաղ տեղեկացրել էինք, որ Միրզոյանը Վրաստան այցի ընթացքում հանդիպումներ է ունեցել Վրաստանի վարչապետ Իրակլի Կոբախիձեի և խորհրդարանի նախագահ Շալվա Պապուաշվիլիի հետ։